नेपाल राष्ट्र बैंकले सुरु गर्यो ग्राहकको गुनासो सुन्न अनलाइन पोर्टल
नेपाल राष्ट्र बैंकले ग्राहकको गुनासो सुन्न अनलाइन पोर्टलको शुरुवात गरेको छ ।
राष्ट्र बैंकले बैंक तथा वित्तीय संस्था र विभिन्न प्रकारका संस्था र एजेन्टले ग्राहकसँग निष्पक्ष, विश्वसनीय र पारदर्शी ढङ्गबाट बैंकिङ क्षेत्रको व्यावसायिक मूल्य तथा मान्यता एवं नीति निर्देशनको अधीनमा रही ग्राहकको हितलाई प्राथमिकतामा राख्न सो पोर्टल सञ्चालनमा ल्याएको हो ।
वित्तीय ग्राहकको हित संरक्षण गर्ने उद्देश्यका साथ ल्याइएको पोर्टलमा गुनासो दर्ता गरेपछि दर्ता भएको जानकारी र दर्ता नं इमेलमार्फत प्राप्त हुनेछ ।
त्यस्तै गुनासो दर्ता नं द्वारा पेश गरिएको गुनासोको स्थिति थाहा पाउन सकिने र दर्ता भएको गुनासोको अन्तिम निर्णय इमेलमार्फत नै जानकारी गराइने राष्ट्र बैंकले जनाएको छ ।
