बागलुङको तीन वडामा १० दिनका लागि लकडाउनको घोषणा
गण्डकी प्रदेश स्थित बागलुङको बलेवा क्षेत्र १० दिनका लागि लकडाउनको घोषणा गरिएको छ ।
विद्यालय र समुदायमा ठुलो संख्यामा कोरोना भाइरस संक्रमण पुष्टि भएपछि बैशाख ७ गते राती १२ बजे देखि १७ गते रातको १२ बजे सम्म लकडाउनको घोषणा गरेको हो ।
मङ्गलबार बागलुङ नगरपालिका-१४ नारायणस्थानको जनताधन माविका १९ विद्यार्थीसहित सोही विद्यालय आसपास समुदायका शङ्कास्पद बिरामीको जाँच गर्दा ३९ जनामा कोरोना सङ्क्रमण पुष्टि भएको थियो ।
यसअघि सोही विद्यालयका दुई शिक्षकमा कोरोना संक्रमण देखापरेको थियो । विद्यालयमा अघिल्लो शुक्रबारदेखि नै पठनपाठन बन्द गरिएको छ ।
मङ्गलबार बसेको जिल्ला कोभिड सङ्कट व्यवस्थापन समितिको बैठकले मङ्गलबार रातिदेखि लागू हुनेगरी लकडाउन घोषणा गरेको हो ।
बागलुङ नगरपालिका-१४ नारायणस्थाल, वडा नं. १२ अमलाचौर र वडा नं. १३ पैञ्युपाटामा दश दिनका लागि लकडाउनको घोषणा गरिएको स्वास्थ्य कार्यालय बागलुङका प्रमुख तथा जिल्ला कोभिड सङ्कट व्यवस्थापन समितिका स्रोत व्यक्ति सुरज गुरौले जानकारी दिए ।
