राष्ट्रपतिसँग असहमति जनाउँदै ब्राजिलका तीनै सेना प्रमुखले दिए सामुहिक राजीनामा
ब्राजिलका राष्ट्रपति जैर बोल्सोनारोले सोमबार आफ्ना रक्षा मन्त्रीलाई हटाएपछि तीनवटै सुरक्षा निकायका प्रमुखले एकै पटक राजीनामा दिएका हुन् ।
राष्ट्रपतिसँग असहमति राखेर इतिहासमा पहिलो पटक तीनै सेनाका प्रमुखले राजीनामा दिएको त्यहाँका सञ्चारमाध्यमहरुले उल्लेख गरेका छन् ।
ब्राजिलको सेना, नेभी र एयर फोर्सका प्रमुखले सामुहिकरुपमा राजीनामा बुझाएका हुन् ।नयाँ रक्षामन्त्रीलाई भेटेर उनीहरूले एकसाथ राजीनामा बुझाएको बताइएको छ ।
मन्त्रालयले उनीहरूको ठाउँमा नयाँ प्रमुखहरू नियुक्त गरिने बताएको छ ।बोल्सोनारोले सेनालाई संविधान र कानुनसम्मत नभई आफ्नो तजबिजमा चलाउन खोजेपछि रक्षामन्त्री फर्नान्डो एजेभेडो इ साल्भाले त्यसको विरोध गरेका थिए ।
कोरोना महामारीलाई नियन्त्रणका लागि प्रभावकारी भूमिका निर्वाह गर्न नसकेको भन्दै चर्को आलोचना खेपिरहेका राष्ट्रपति बोल्सोनारोलाई यो घटनापछि चुनौती थपिने भएको छ ।
ब्राजिलमा अहिलेसम्म कोरोना संक्रमणबाट ३ लाख १४ हजार मानिसको ज्यान गइसकेको छ भने पछिल्लो समय त्यहाँ संक्रमण फेरि तीव्र रूपमा फैलिरहेको छ ।
