सिके राउतलाई ३५ दिनभित्र हाजिर हुन नवलपरासी अदालतको सूचना
नवलपरासी जिल्ला अदालतले सिके राउतलाई ३५ दिनभित्र हाजिर हुन सूचना जारी गरेको छ ।
अदालतले गोरखापत्र दैनिकमा सूचना निकालेर यसअघि पक्राउ पुर्जी जारी गरिएकोमा घर पत्ता नलागेकोले मुलुकी फौजदारी कार्यविधि संहिताबमोजिम सबुदसहित उपस्थित हुन भनिएको हो ।हाजिर हुन नआएमा कानुनअनुसार हुने भनिएको छ ।
सरकार नियन्त्रित छापा माध्यम गोरखापत्रले राउत पक्राउको पूर्जी सूचना जारी गरे पनि जबकी सरकार र सिके राउत दुई वर्षअघि २०७५ साल फागुन २४ गतेका दिन ११ बुँदे सहमति भई राउत खुला राजनीतिमा आइसकेका छन् ।
राउतसहित उनका कार्यकर्तामाथि लागेको सबै मुद्दा सरकारले फिर्ता लिने सहमति बुँदा नम्बर ५ मा गरिएको थियो । तर दुई वर्षपछि अदालतले राउतलाई राज्यविरुद्धको संगठित अपराधमा पक्राउ पूर्जी जारी गरेको हो ।
राउत नेतृत्वको समूह २०७५ फागुन २४ मा सरकारसँग ११ बुँदे सहमति गर्दै मूलधारको राजनीतिमा आए पनि त्यसअघि भने राज्यविरुद्धको अपराधमा मुद्दा दायर गरिएको थियो ।
राउतविरुद्ध नवलपरासी अदालतमा राज्यविरुद्धको सङ्गठित अपराधको मुद्दा विचाराधीन छ ।
