आज नेपाल-भारत वाणिज्य सचिवस्तरिय बैठक बस्दै
आज नेपाल-भारत वाणिज्य सचिवस्तरिय बैठक बस्दै छ । हरेक दुई वर्षमा हुने बैठक यस वर्ष कोरोना महामारीका कारण आठ महिनापछि हुन लागेको हो ।
दुई देशको व्यापार र पारवहन सन्धिमा भएका व्यवस्थाको पुनरावलोकन गर्न नेपाल र भारतका वाणिज्य सचिवस्तरिय बैठक भिडियो कन्फरेन्स माध्यमबाट आज सुरु हुँदै छ ।
बैठकमा उद्योग वाणिज्य तथा आपूर्ति मन्त्रालयका सचिव बैकुण्ठ अर्याल र भारतीय समकक्षी अनुप वाधवानले टोलीको नेतृत्व गर्ने बताइएको छ ।
दुवै देशका वाणिज्य मन्त्रालयका सहसचिव नेतृत्वको अन्तर सरकारी उपसमितिको बैठकमा भएका छलफलका एजेण्डालाई सचिवस्तरिय बैठकले अन्तिम रुप दिने बताइएको छ ।
यसअघि २०७५ वैशाखमा काठमाडौंमा नेपाल भारतका वाणिज्य सचिवस्तरिय बैठक भएको थियो ।
प्राविधिक समितिका अनुसार नेपाल र भारतका सीमा क्षेत्रमा एकीकृत जाँच चौकी, सुक्खा बन्दरगाहलगायतका पूर्वाधार निर्माणको विषयमा पनि छलफल हुने बताइएको छ ।
यस्तै हाल भएका भन्सार विन्दुको स्तरिकरण गर्ने विषयमा पनि कुरा उठाउने नेपाली प्रतिनिधिमण्डलको तयारी रहेको छ ।
