बिहार विधानसभा चुनावमा फेरि एनडीए गठबन्धनलाई पूर्ण बहुमत
बिहार विधानसभा निर्वाचनमा भारतीय जनता पार्टीको एनडीए गठबन्धनले १२५ सिट जित्दै पूर्ण बहुमत प्राप्त गरेको छ ।
बिहार विधानसभा निर्वाचनबाट एनडीएलाई फेरि एक कार्यकाल सरकार बनाउने जनादेश प्राप्त भएको छ ।यस्तै उनीहरूसँग निक्कै प्रतिष्पर्धामा रहेको लालुप्रसाद यादवका छोरा तेजस्वी यादव नेतृत्वको गठबन्धनले १ सय १० सिट पाएको छ ।
२ सय ४३ सिटको विधानसभामा बीजेपीको ७४, जेडीयूको ४३, हिन्दुस्थानी अवाम मोर्चाको ४ र विकासशील इसान पार्टीको ४ गरेर एनडीए गठबन्धनले १ सय २५ सिट जितेको हो ।
महागठबन्धनतर्फ भने राष्ट्रिय जनता दलको ७५, कांग्रेसको १९, सीपीएमएलको १२, सीपीएमको २ र सीपीआइको २ गरी तेजस्वी यादववाला महागठबन्धनको १ सय १० सिटमा जित भएको भारतीय सञ्चारमाध्यमले जनाएका छन् ।
चुनावको नतिजापछि नतिजापछि प्रधानमन्त्री नरेन्द्र मोदीले ट्वीट गरेर बिहारका जनताप्रति आधार व्यक्त गरेका छन् । बिहारका जनताको आशिर्वादबाट एकपटक फेरि लोकतन्त्रको जित भएको उनले उल्लेख गरेका छन् ।
यो जनादेशलाई आत्मनिर्भर बिहारको नयाँ रोडम्यापको संज्ञा दिँदै प्रधानमन्त्री मोदीले लेखेका छन्, ‘यो नयाँ दशक बिहारको हुने छ र आत्मनिर्भर बिहार त्यसको रोडम्याप हुने छ ।’
मोदीले अगाडि लेखेका छन्, ‘आज बिहारले फेरि दुनियाँलाई लोकतन्त्रको पाठ पढाएको छ । लोकतन्त्र कसरी मजबुत बनाउने भनेर देखाएको छ । बिहारका गरिब, बन्चित र महिलाहरुले पनि ऐतिहासिक मतदान गरे र विकासका लागि आफ्नो निर्णायक फैसला पनि सुनाए ।’
