भारतीय सेना प्रमुख नरवाणे काठमाडौं आइपुगे
भारतीय सेना प्रमुख मनोज मुकुन्द नरवाणे काठमाडौं आइपुगेका छन् ।
नेपाली सेनाका प्रधानसेनापति पूर्णचन्द्र थापाको औपचारिक निम्तोमा उनी बुधवार नेपाल आएका हुन् ।
भारतीय सेनाको विशेष विमानमार्फत ४ सदस्यीय टोलीसहित बिहान ११ः४५ बजे नरवाणे त्रिभुवन अन्तर्राष्ट्रिय विमानस्थलमा ओर्लिएका सैनिक स्रोतले जनाएको छ ।
उनी विमानस्थलबाट सोझै सोल्टी होटल गएका छन् । बुधवार कुनै औपचारिक भेटघाटको कार्यक्रम नभए पनि उनी पशुपतिनाथ क्षेत्रमा दर्शनको लागि जाने कार्यक्रम तय भएको जनाइएको छ ।
नेपाल भ्रमणमा रहँदा उनले प्रधानमन्त्री केपी शर्मा ओलीसँग भेटवार्ता गर्नेछन् । उनलाई राष्ट्रपति विद्यादेवी भण्डारीले नेपाली सेनाको मानार्थ उपाधि दिने कार्यक्रम छ ।
नेपाली सेनाले आयोजना गरेका विभिन्न कार्यक्रममा सरिक हुने तथा प्रधानसेनापतिसँग औपचारिक वार्ता गर्ने कार्यक्रम समेत छ । नेपाल–भारत सीमा विवाद बढेको समयमा भारतीय सेनाध्यक्षको भ्रमणलाई महत्त्व र चासोका साथ हेरिएको छ ।
