प्रदेश ५ को सभामा कांग्रेसले बिध्वंश मच्चाएपछि भोलीसम्मका लागि बैठक स्थगित
प्रदेश ५ मा प्रमुख प्रतिपक्षी दल नेपाली कांग्रेसको विरोधका बीच चलेको प्रदेशसभा बैठक स्थगित गरिएको छ । सभामुख पुर्णबहादुर घर्तीले मंगलबार दिउँसो १२ बजेसम्मका लागि बैठक स्थगित गरेका हुन् ।
सोमबारको बैठकमा आन्तरिक मामिला तथा कानुनमन्त्री कुलप्रसाद केसीले प्रदेशको नाम लुम्बिनी र स्थायी राजधानी दाङ राप्ती उपत्यका तोक्ने प्रस्ताव पेस गरेका थिए ।
प्रस्ताव लिएर रोष्टम जान खोज्दा कांग्रेस सांसदहरूले अवरोध गरेपछि मर्यादापालकको सहयोगमा मन्त्री केसी रोष्टमसम्म पुगेका थिए ।
उनको प्रस्तावमा केही सांसदले भाग लिए पनि विपक्षी कांग्रेसका सांसदले उभिएर विरोध जनाए ।
केही बेरपछि कांग्रेस सांसदहरूले नाराबाजी गर्दै कुर्सी फालाफाल गरेका थिए ।
