धरानमा उपचाररत सप्तरीका ३५ बर्षीय कोरोना संक्रमित पुरुषको मृत्यु
प्रदेश नं १ धरानस्थित बीपी कोइराला स्वास्थ्य विज्ञान प्रतिष्ठानमा उपचारत सप्तरीका ३५ बर्षीय कोरोना संक्रमितको मृत्यु भएको छ ।
सप्तरीको खडक नगरपालिका (३ का स्थानीय ३५ वर्षीय पुरुषको बुधबार बिहान ६ बजेर १० मिनेटमा उपचारका क्रममा मृत्यु भएको प्रतिष्ठानका प्रवक्ता डा. निदेश सापकोटाले जानकारी दिए ।
राजविराजस्थित गजेन्द्र नारायणसिंह अस्पतालबाट भदौ ३० गते प्रतिष्ठानमा भर्ना भएका बिरामीमा मृगौलाको समस्या रहेको थियो ।
भदौ २८ मा राजविराजको अस्पतालमै कोरोना संक्रमण पुष्टि भएपछि मंगलबार प्रतिष्ठानको कोभिड १९ अस्पतालमा बिहान १० बजेर ४६ मिनेटमा भर्ना गरिएको थियो ।
प्रतिष्ठानका अनुसार बिरामीको गत एक वर्षदेखि सातामा दुईपटक डाइलाईसिस गरिँदै आइएको थियो । उनमा उच्च रक्तचापको समेत समस्या रहेको थियो ।
यससँगै १ प्रदेशमा हालसम्म ५१ जना कोरोना संक्रमितको उपचारका क्रममा मृत्यु भएको छ । जसमा प्रदेश १ बाहिरका २ महिला र ११ पुरुष गरि कुल १३ जनाको मृत्यु भएको छ ।
