कोरोनाका कारण मुसलमान धर्मावलम्बीहरुले मनाउने मोहर्रम पर्व प्रभावित
मुसलमान धर्मावलम्बीहरुले झाँकी जुलुसका साथ मनाउने मोहर्रम पर्व कोरोना भाइरस महामारीका कारण प्रभावित बनेको छ ।
कोरोना महामारीका कारण मुसलमान समुदायले यो वर्ष घरमै बसेर आज मोहर्रम पर्व मनाउँदैछन् ।मुसलमान धर्मका अगुवाहरुले मोहर्रम पर्व घरमै बसेर मनाउन आग्रह गरेका छन् ।
बाँकेमा रहेका मुसलमान धर्मावलम्बीहरुलाई नेपाल सरकारको निर्देशिकाअनुसार यसपटकको मोहर्रम पर्व घरमै बसी मनाउन अनुरोध गरिएको नेपाल मोहर्रम तथा कर्बला संरक्षण समितिका प्रवक्ता मोहम्म्मद हारुन हलवाइले जानकारी दिए ।
उनका अनुसार यो वर्ष मोहर्रम पर्वअन्तर्गत निकालिने सम्पूर्ण जुलुुसको कार्यक्रम स्थगन गरिएको छ । मुसलमान समुदायले आ-आफ्नो घर अगाडि सजाएको ताजिया सेलाउन कर्बला जाँदा कुनै किसिमको भीड जम्मा नहुने गरी आलोपालो मिलाउन आग्रह गरिएको छ ।
मोहर्रम पर्व एवं कर्बला संरक्षण समितिका अध्यक्ष तथा प्रदेशसभा सदस्य मोहम्मद याकुब अन्सारीले योे वर्ष कोरोना महामारीका कारण चाडपर्व घरभित्रै भीडभाड नहुने गरी मनाउन आग्रह गरिएको बताए ।
यो महिना हजरत हसन र हजरत हुसैनले सत्यका लागि आफ्नो सम्पूर्ण परिवारसहित शहादत अर्थात् बलिदानी दिएकाले त्यसैको स्मरणमा मोहर्रम पर्व मनाउने गरिएको अन्सारीले उल्लेख गरे ।
मुस्लिम समुदायले आफ्नो गच्छेअनुसारका ताजिया राख्ने गरेका छन् । यो वर्ष कोरोना महामारीका कारण मोहर्रम पर्वमा पनि कुनै तामझाम नहुने मोहर्रम पर्व एवं कर्बला संरक्षण समितिका अध्यक्ष तथा प्रदेशसभा सदस्य अन्सारीले जानकारी दिए ।
नरैनापुरमा सार्वजनिक बिदा
मुसलमान समुदायको बाहुल्य रहेको बाँकेको नरैनापुर गाउँपालिकाले मोहर्रम पर्वमा आज सार्वजनिक बिदा दिएको छ । मुसलमान धर्मावलम्बीको पर्व मोहर्रममा आज सार्वजनिक बिदा दिइएको गाउँपालिकाका उपाध्यक्ष जयन्तीदेवी श्रीवास्तवले बताए ।
कोरोना भाइरस महामारीका कारण सिर्जित असहज परिस्थितिका कारण सामाजिक दूरी कायम गरेर भीडभाड नगरी पर्व मनाउन उपाध्यक्ष श्रीवास्तवले आग्रह गरेका छन् । उच्च स्वास्थ्य सतर्कताका अपनाउँदै घरमै बसी आ–आफ्नो परिवारमा हर्षोल्लासका साथ मोहर्रम पर्व मनाउन गाउँपालिकावासीलाई अनुरोध गरिएको छ ।
