आज काठमाडौं उपत्यकामा मात्रै ९२ जना कोरोना संक्रमित थपिए
नेपालमा पछिल्लो समयमा कोरोना संक्रमण तिब्रगतिमा फैलिरहेको अवस्थामा आज आइतबार काठमाडौं उपत्यकामा मात्र ९२ जनामा कोरोना पुष्टि भएको छ ।
स्वास्थ्य तथा जनसंख्या मन्त्रालयका अनुसार काठमाडौं जिल्लामा ९० र ललितपुरमा २ जना देखिएका छन् ।
योसंगै काठमाडौं उपत्यकामा संक्रमितको संख्या एक हजार १ सय ३६ पुगेको छ । राष्ट्रिय जनस्वास्थ्य प्रयोगशाला टेकुको प्रयोगशालामा गरिएको परीक्षणमा काठमाडौंका ४४ जनामा र ललितपुरका १ जनामा संक्रमणको पुष्टि भएको मन्त्रालयले जनाएको छ ।
यस्तै शुक्रराज ट्रपिकल तथा सरुवा रोग अस्पतालमा गरिएको परीक्षणमा काठमाडौंका १८ जनामा संक्रमण देखिएको छ भने स्टार अस्पताल सानेपाको प्रयोगशालामा गरिएको परीक्षणमा काठमाडौंका १३ जनामा र ललितपुरका १ जनामा संक्रमण देखिएको छ ।
यसैगरी पाटन अस्पतालमा गरिएको परीक्षणमा काठमाडौंका ५ जनामा र वीर अस्पतालमा काठमाडौंका १ जनामा संक्रमणको पुष्टि भएको छ । यता ह्याम्स अस्पताल महाराजगञ्जमा गरिएको परीक्षणमा काठमाडौंका ८ जनामा संक्रमण पुष्टि भएको छ भने नेपाल कोरिया मैत्री अस्पतालमा गरिएको परीक्षणमा काठमाडौंंको १ जनामा संक्रमण देखिएको छ ।
यस्तै बीरेन्द्र सैनिक अस्पतालमा गरिएको परीक्षणमा काठमााडौंका १ जनामा संक्रमण पाइएको छ । योसँगै काठमाडौंमा संक्रमितको कुल संख्या ९ सय १६ , ललितपुरमा १२९ र भक्तपुरमा ८५ संक्रमित गरी उपत्यकामा संक्रमित हुनेको संख्या कुल संख्या १ हजार १ सय ३६ पुगेको छ ।
काठमाडौं उपत्यकाका संक्रमित कुन ठाउँका हुन् भन्ने स्वास्थ्य मन्त्रालयले खुलाएको छैन ।आइतबार देशभरमा ३ सय ८० जना संक्रमित भेटिएका छन् ।
