माडी नपाको नाम परिवर्तन गरेर अयोध्यापुरी बनाइने, विशाल मूर्ति स्थापना गर्न प्रधानमन्त्रीको निर्देशन
माडी नपाको नाउँ नै परिवर्तन गरेर अयोध्यापुरी बनाइने भएको छ । प्रधानमन्त्रीसँगको भेटमा माडी नगरपालिकाका जनप्रतिनिधिहरुको उक्त पालिकाको नाम नै परिवर्तन गरे अयोध्यापुरी बनाइने बताएका हुन् ।
यसैबीच प्रधानमन्त्री केपी शर्मा ओलीले भगवान् रामको जन्मभूमि अयोध्या नेपालमै रहेको दोहोर्याउँदै चितवनको माडी नगरपालिकाका जनप्रतिनिधिलाई उक्त क्षेत्रमा बृहत् धार्मिक मेला लगाउन तथा राम-सीता र लक्ष्मणको विशाल मूर्ति स्थापना गर्न भनेका छन् ।
साविक अयोध्यापुरीसहित चार गाविस गाभेर माडी नगरपालिका बनाइएको हो । खोज समितिका संयोजक पौडेल साविक अध्योध्यापुरी गाविसका अध्यक्ष हुन् ।
तत्कालीन अयोध्यापुरी गाविस अहिले माडी नगरपालिकाको वडा नं ८ र ९ मा पर्छ । माडी नगरपालिका–१ मा वाल्मीकि ऋषिको आश्रम पनि छ । त्यहाँ लवकुशको जन्म भएको भन्ने गरिन्छ ।
माडी नगरपालिकाका प्रमुख ठाकुर ढकालसहितको टोलीलाई शनिबार प्रधानमन्त्री निवास बालुवाटारमै बोलाएर ओलीले यस्तो सुझाव दिएका हुन् ।
‘आउँदो रामनवमीमा बृहत् धार्मिक मेला गर्न तथा अर्को वर्षको रामनवमीमा राम-सीता र लक्ष्मणको विशाल मूर्ति स्थापना गर्न प्रधानमन्त्रीले सुझाव दिनुभएको छ,’ माडी नगरपालिकाले गठन गरेको अयोध्या खोज, अनुसन्धान तथा व्यवस्थापन समितिका संयोजक नारदमणि पौडेलले भने ।
प्रधानमन्त्री ओलीलाई भेट्न माडीबाट नगरप्रमुख ढकालसहितको टोली काठमाडौं गएको थियो । माडी नगरका प्रवक्तासमेत रहेका वडा नं ९ का अध्यक्ष शिवहरि सुवेदीका अनुसार साँझ प्रधानमन्त्री निवासमा भएको छलफलमा उपप्रधानमन्त्री ईश्वर पोखरेललगायतको उपस्थिति थियो ।
माडी क्षेत्रको धार्मिक महत्त्वबारे अध्ययन गर्दै आएका लोकमणि पौडेल पनि प्रधानमन्त्री ओलीसँगको छलफलमा सहभागी थिए । उनले धार्मिक आधारहरूबाट पनि अयोध्या माडीमा पर्ने मत राख्दै आएका छन् । ‘प्रधानमन्त्रीज्यूले माडीको अयोध्यापुरी नै राम जन्मभूमि भएको आधार छ, यसलाई स्थापित गर्नुपर्छ भन्नुभयो,’ नगर प्रवक्ता सुवेदीले भने ।
प्रधानमन्त्री ओलीले ठोस प्रमाण जुटाउँदै जान र योजना बनाएर काम पनि सुरु गर्न सुझाएका छन् । ‘शास्त्रीय हिसाबले अध्ययन गर्दा माडी क्षेत्रमा नै प्राचीन अयोध्या भएका आधारहरू धेरै रहेको प्रधानमन्त्रीले हामीलाई बताउनुभयो । उहाँले खोज अनुसन्धान र कार्ययोजना बनाउन भन्नुभएको छ,’ खोज समितिका संयोजक पौडेलले भने ।
प्रधानमन्त्री ओलीले गत असार २९ गते भानु जयन्तीका अवसरमा बालुवाटारमै आयोजित कार्यक्रममा वीरगन्ज नजिकको ठोरीमा अयोध्या भएको बताएका थिए ।
प्रधानमन्त्री ओलीले माडी-९ कुसुमखोलामा सुकुम्बासी बस्तीमा निकुञ्जले आगो लगाएको घटनाबारे पनि चासो राखेका थिए । उनले निकुञ्जको संरक्षणसँगै भूमिहीनको पनि व्यवस्थापन गर्ने आश्वासन दिएको प्रवक्ता सुवेदीले बताए ।
