प्रचण्डसँग छलफल सकेर ओली बालकोटस्थित निजी निवासमा
नेकपा अध्यक्ष एवं प्रधानमन्त्री केपी शर्मा ओली पार्टीका अर्का अध्यक्ष पुष्पकमल दाहाल ‘प्रचण्ड’सँग छलफल सकेर भक्तपुरस्थित आफ्नो निजी निवास बालकोट पुगेका छन् ।
सोमवार बिहान प्रचण्ड र झलनाथ खनालसँग छलफल गरेपछि ओली साढे ११ बजे बालकोट पुगेका हुन् ।
२०७४ फागुनमा प्रधानमन्त्री निर्वाचित भएर बालुवाटारस्थित सरकारी निवासमा सरेपछि ओली बिरलै मात्र बालकोट पुग्ने गरेका थिए ।
मन्त्री पदमा रहुञ्जेल बालकोटस्थित ओलीको निवासमा तत्कालीन सूचना तथा सञ्चार मन्त्री गोकुल बाँस्कोटा बस्ने गरेका थिए ।
प्रधानमन्त्री ओलीका सहयोगीहरूले निजी निवासमा गएको बताएपनि किन भन्ने खुलाएनन् ।
‘प्रधानमन्त्रीज्यू, आफ्नो निवासमा जानका लागि कुनै कार्यक्रम आवश्यक पर्दैन,’ उनका एक सहयोगीले भने ।
ओली निजी निवासमा पुगेपछि नेकपाका कार्यकर्ताहरू बालकोट पुगेका छन् ।
मृगौला प्रत्यारोपण गरेपछि राष्ट्रपति कार्यालय, संसद् भवन र सिंहदरबारबाहेक अन्यत्र नगएका ओली गत मंगलवार उपाध्यक्ष वामदेव गौतमको भैँसेपाटीस्थित निवासमा पुगेका थिए ।
