कोरोना बम बन्दै काठमाडौंका ‘सडक’, माइक्रोमा यात्रु खचाखच, ट्राफिक रमिते !
आइतबार काठमाडौंमा गुडिरहेका माइक्रोहरु हेर्दा जो कोहीलाई नि लाग्न सक्थ्यो कोरोना बम लिएर गुडिरहेको छन ।
नत्, सामाजिक दुरी कायम छ नत सरकारले भनेको नियम अनुसार माइक्रोहरुले पालना गरेका छन ।
यात्रु खचाखच हालेर माइक्रोहरु कुद्दा समेत कारबाही गर्नुको साटो ट्राफिक रमिते बन्यो ।
सार्वजनिक यातायातमा चढ्ने सबै यात्रुले मास्क लगाउनुपर्ने, स्यानिटाइजर प्रयोग गर्नुपर्ने, चालकले पञ्जासहित मास्क पनि लगाउनुपर्ने, सिटको आधा मात्रै यात्रु चढाउनु पर्ने, सिटको एक लहरमा एकजना मात्रै यात्रु राख्नुपर्ने र तोकिएको भाडादरको ५० प्रतिशत बढी भाडा लिन पाउने जस्ता व्यवस्था सरकारले गरेको थियो ।
तर पालना नै भएको छैन ।
न्यून मात्रामा मात्रै सार्वजनिक सवारीसाधन चलेकाले सर्वसाधारण जोखिम मोलेरै भए पनि यात्रा गर्न बाध्य छन् ।
आज बिहान मात्रै रत्नपार्कबाट माइक्रोमा यात्रा गरेका यात्रु सुनिल कार्कीले भने, ‘जोखिम निकै रहेछ ।
पुरानै हिसाबले यात्रु कोचेरै राखिएको पाइयो । एकातिर ५० प्रतिशत बढी भाडा लिने र अर्कोतिर कोचेर यात्रु राख्दा कोरोना जोखिम बढेको छ । यसप्रति को जवाफदेही हुने ?’
धेरैजसो ठाउँमा ट्राफिक रमिते बसेको पाइएको छ । महानगरीय ट्राफिक महाशाखाका एसएसपी भीमप्रसाद ढकाल सरकारले तोकेको स्वास्थ्य मापदण्ड पालना नगरी बढी यात्रु बोकेर सञ्चालनमा ल्याएका यात्रुवाहक सार्वजनिक भाडाका सवारीलाई कारबाही गरिने बताउँछन् ।
