उच्च पदस्थ व्यक्तिहरुको विदेश भ्रमण साह्रै महँगो, एकै वर्षमा ११ करोड सकियो
उच्च पदस्थ व्यक्तिहरुको विदेश भ्रमण साह्रै महँगो हुन थालेको छ ।
आर्थिक वर्ष २०७५/७६ मा सरकारले व्यवस्था मिचेर बजेटभन्दा थप ११ करोड खर्च गरेको पाइएको हो ।
विशिष्ट व्यक्ति तथा प्रतिनिधि मण्डलको भ्रमण खर्चमा रु.६ करोड ८५ लाख बजेट व्यवस्था गरिएको छ ।
महालेखा परीक्षकको प्रतिवेदनअनुसार सरकारले व्यवस्था गरिएभन्दा १४८.२० प्रतिशत बढी हुनेगरी १७ करोड रुपैयाँ भ्रमणमा खर्च गरिएको हो ।
यस्तै सरकारले मनोरञ्जन, चियापान, भोज लगायतमा १८.९१ प्रतिशत रकम वृद्धि गरी खर्च गरेको छ ।
खर्च रकम वर्गीकरण र व्याख्याअनुसार विविध खर्चबाट मनोरञ्जन, चियापान, भोज, कार्यालय सुरक्षा, अतिथि सत्कारलगायतका खर्च बेहोर्ने व्यवस्था छ ।
महालेखा नियन्त्रक कार्यालयबाट पेश भएको आर्थिक विवरणअनुसार विविध खर्चमा रु.१ अर्ब ३२ करोड ८५ लाख बजेट विनियोजन भएको थियो ।
सरकारले यसमा १८.९१ प्रतिशत वृद्धि गरी रु.१ अर्ब ५७ करोड ९७ लाख खर्च गरेको महालेखा परीक्षकको प्रतिवेदनमा उल्लेख गरिएको छ ।
