राजमार्गहरु सुधारका लागि विश्व बैंकले ५४ अर्ब ऋण सहयोग गर्ने
नेपालले विश्व बैंकसँग अहिलेसम्मकै ठूलो ऋण सम्झौतामा हस्ताक्षर गरेको छ।
विश्व बैंकले रणनीतिक सडक सञ्जाल सुधार र व्यापार सहजीकरण आयोजनाका लागि ५४ अर्ब रुपैयाँ (४५० मिलियन अमेरिकी डलर) दिने सम्झौतामा अर्थसचिव शिशिरकुमार ढुंगाना र विश्व बैकका राष्ट्रिय निर्देशक फारिस हदाद जेर्भोसले हस्ताक्षर गरेका छन्।
यो आयोजना विश्व बैंक र नेपालबीच हालसम्म भएको सबैभन्दा उच्च मूल्यको एकल आयोजना हो।
कार्यक्रममा अर्थमन्त्री डा युवराज खतिवडाले यी आयोजना कार्यान्वयनबाट नेपालको आर्थिक वृद्धिमा सहयोग पुग्ने बताए। खतिवडाले पूर्व-पश्चिम राजमार्ग नेपालको ‘लाइफ लनइन’ भएको भन्दै त्यसको विस्तार सरकारको प्राथमिकताको विषय भएको उल्लेख गरे। खतिवडाले कार्यक्षमता विस्तार गरी लक्ष्यअनुसार उपलब्धि हासिल गर्दै जाने पनि बताए। व्यापार सहजीकरण र क्षेत्रीय सडक सञ्जाल विस्तार सरकारको सधैंको प्राथमिकता हुने गरेको भन्दै खतिवडाले सडक सुरक्षालाई पनि सँगसँगै ध्यान दिइनुपर्ने उल्लेख गरे।
