विश्वभरीमा अहिलेसम्म कोरोनामुक्त हुनेको संख्या ८० लाखभन्दा धरै पुग्यो
विश्वमा अहिले कोरोना माहामारी फैलिएको अवस्थामा अहिलेसम्म विश्वभरीमा कोरोनामुक्त हुनेको संख्या ८० लाख भन्दा धरै पुगेको छ ।
विश्वका विभिन्न देशमा अहिलेसम्म एक करोड ३६ लाख ९१ हजार ५ सय ७० जनामा सङ्क्रमण पुष्टि भएकोमा ८० लाख ३७ हजारभन्दा धेरै मानिस उपचारपछि निको भएका वल्डोमिटरले जनाएको छ ।
अहिले उपचार गराइरहेका ५० लाख ६७ हजारभन्दा धेरैमध्ये एक प्रतिशत अर्थात साढे ५९ हजार जनाको अवस्था जटिल रहे पनि बाँकी ५० लाख भन्दा धेरैको अवस्था सामान्य छ । कोरोना सङ्क्रमणका कारण ५ लाख ८६ हजार जनाको भने ज्यान गएको छ ।
कोरोनाबाट सबैभन्दा धेरै अमेरिकामा ३६ लाख १६ हजार ७ सय ४७ जनामा सङ्क्रमण पुष्टि हुँदा १ लाख ४० हजार भन्दा ज्यान गएको छ ।
यस्तै ब्राजिलमा राष्ट्रपति जाएय बोलसोनारोसहित १९ लाख ७० हजारभन्दा धेरैमा सङ्क्रमण पुष्टि हुँदा साढे ७५ हजारको ज्यान गएको छ । राष्ट्रपति बोलसोनासोको दोस्रो रिपोर्ट पनि पोजेटिभ आएपछि उनी आइसोलेशनमा नै छन् ।
यसैबीच भारतमा एकैदिन ३० हजारभन्दा धेरैमा सङ्क्रमण पुष्टि भएको छ । भारतमा हिजो मात्रै साढे ३२ हजारभन्दा धेरै नयाँ बिरामी थपिएका छन् ।
तर भारतको केन्द्रीय स्वास्थ्य मन्त्रालयले भने २९ हजार ४ सय २९ जनामा कोरोना भएको पुष्टि गरेको छ ।हिजो एकैदिन ५ सय ८२ जनाको ज्यान गएको छ ।
भारतमा मात्रै अहिलेसम्म ९ लाख ७० हजारभन्दा धेरैमा कोरोना सङ्क्रमण भएको र साढे २४ हजारभन्दा धेरैको ज्यान गएको वल्डोमिटरले जनाएको छ । विश्वभर कोरोना सङ्क्रमित धेरै हुने देशको सूचीमा भारत तेस्रो स्थानमा छ ।
यस्तै भारतको बिहारमा आजदेखि १५ दिनका लागि लकडाउन गर्ने निर्णय भएको छ । सङ्क्रमितसँगै ज्यान गुमाउनेको संख्या बढ्न थालेपछि भारतको विभिन्न राज्यमा फेरि लकडाउन घोषणा गरिएको हो ।
