साउदीमा म्याद सकिएका नेपालीको भिसाको सयम ३ महिना थप, शुल्क बुझाउन नपर्ने
साउदी अरबले म्याद सकिएका आवासीय भिसाको समय तीन महिना थपिदिएको छ । यसको लागि कामदार वा रोजगारदाताले थप शुल्क बुझाउनुपर्ने छैन ।
साउदीका लागि नेपाली राजदूत महेन्द्रसिंह राजपुतले भिसाको म्याद समाप्त भएका कामदारले कानुनी हैसियत पाएको बताए । यसले आवासीय भिसाको म्याद समाप्त भएका कामदार गैरकानुनी हैसियत हुनबाट जोगिएका छन् ।
साउदी अरबको राहदानी विभाग (जवाजत) का अनुसार राजकीय निर्णयअनुसार कामदारको भिसाको म्याद थपिएको हो । भिसाको समय थप गर्नका लागि जवाजतमा गई आवेदन दिइराख्नु पर्ने छैन ।
‘भिसाको म्याद समाप्त भएकाहरुको हकमा के हुन्छ भन्ने चिन्ता थियो । सयौं नेपालीले दूतावासमा सम्पर्क गरिरहेका थिए,’ उनले भने,‘कामदारले अब भिसाका विषयमा चिन्ता लिनुपरेन ।’
बिदामा नेपालमा आएका कामदारको पनि भिसाको म्याद आफै थपिएको छ । नेपालमा रहँदा भिसाको म्याद समाप्त भए पनि हवाई उडान खुलेपछि उनीहरुले भिसालाई प्रयोग गर्न पाइने साउदीको राहदानी विभागले जनाएको छ ।
