नेकपा भित्रको आन्तरिक कलहले संसद् अधिवेशन अन्त्य गरिएको भन्दै कांग्रेस रुष्ट
पार्टीभित्रको झगडाका कारण प्रधानमन्त्रीले संसद् अधिवेशन अन्त्य गरिएको भन्दै कांग्रेस रुष्ट बनेको छ ।
प्रमुख प्रतिपक्षी नेपाली कांग्रेसले संसद अधिवेशन अन्त्य गर्ने प्रधानमन्त्री केपी शर्मा ओलीको कदम गैरजिम्मेवार रहेको भन्दै आक्रोस पोखेको हो ।
पार्टीभित्रको झगडा सामना गर्न नसकेर प्रधानमन्त्रीले सबैभन्दा पहिले संघीय संसदको अधिवेशन अन्त्य गर्ने निर्णय गर्नु जनताप्रतिको विश्वास र भरोसामाथि प्रहार भएको कांग्रेसले बताएको छ ।
कांग्रेसका प्रमुख सचेतक बालकृष्ण खाँणले मन्त्रिपरिषदको सिफारिसमा अधिवेशन अन्त्य गर्ने निर्णयले सरकार, नेकपा र स्वयम् प्रधानमन्त्रीलाई भलो नहुने बताए ।
‘आफ्नो पार्टीभित्रको आन्तरिक झगडाको व्यवस्थापन गर्न नसकेर प्रधानमन्त्रीले सबैभन्दा पहिलो सिकारका रूपमा संघीय सदनलाई बनाउनुभयो। यसले उहाँलाई मात्र होइन सत्तारूढ नेकपा र सरकारलाई फाइदा गर्दैन,’ खाँणले बताए ।
मन्त्रिपरिषदको बिहीबारको बैठकले संसद अधिवेशन आजै बेलुकी ५ बजेदेखि अन्त्य गर्ने निर्णय गरेको थियो । सरकारको सिफारिसमा राष्ट्रपति कार्यालयले अधिवेशन अन्त्य गरिसकेको छ ।
मन्त्रिपरिषद बैठकले संसदमा बिजनेश पनि नभएको र कोरोना महामारी रहेको भन्दै अधिवेशन अन्त्य गर्ने सिफारिस राष्ट्रपति समक्ष गरेको थियो । कांग्रेसका सांसद मीनेन्द्र रिजालले नेकपाभित्रको आन्तरिक झगडाले संसद अधिवेशन अन्त्य गर्नु राम्रो नभएको बताए ।
‘पार्टीभित्रको आन्तरिक द्वन्द्वको कारण सदनको अधिवेशन अन्त्य गर्ने कुरा सरकारले गरेको सुनियो, यो राम्रो होइन,’ सांसद रिजालले बताए ।
