लकडाउनका कारण घर बसेका सरकारी कर्मचारी भोलीदेखि अफिस जाँदै
गत साता सरकारले गरेको निर्णय अनुसार भोली (सोमबार) देखि सरकारी कार्यालय खुल्ने भएका छन ।
झन्डै ८४ दिन लकडाउनका कारण बन्द रहेका सरकारी कार्यालय असार १ गते अर्थात भोलिदेखि सञ्चालनमा आउने भएका हुन ।
सरकारले लकडाउनलाई खुकुलो बनाउने रणनीति स्वरुप सबै सरकारी कार्यालयहरु कोरोना सङ्क्रमणबाट सुरक्षा विधि अपनाएर सञ्चालन गर्ने रणनीति अघि बढाएको छ ।
गत बुधबार बसेको मन्त्रिपरिषदको बैठकले सरकारी कार्यालय सुचारु गर्ने निर्णय गरेको थियो ।
कार्यालय सञ्चालन हुने तर सार्वजनिक यातायात सञ्चालन नहुने भएपछि आफ्नो सवारी साधन नभएका कर्मचारीका लागि पैदल हिँडेर कार्यालय जानुबाहेक अर्काे विकल्प सरकारले दिएको छैन ।
यस्तै सवारी साधन भएका कर्मचारीहरुले पनि सम्बन्धित कार्यालय प्रमुखको सिफारिसमा सवारी पास बनाउनुपर्ने व्यवस्था गरिएको छ ।
