फरक आसनमा बैठक : राष्ट्रपति र प्रधानमन्त्रीवीच भेटवार्ता, दुई अध्यक्षबीच बेग्लै वार्ता
चौतर्फी चासोको विषय बनेको सत्तारुढ नेपाल कम्युनिस्ट पार्टी (नेकपा) को सचिवालय बैठक सुरु भएको छ ।
राजधानी स्थित प्रधानमन्त्री निवास बालुवाटारमा शनिबार साँझ सुरु भएको बैठकमा प्रधानमन्त्री एवं अध्यक्ष केपी शर्मा ओली र कार्यकारी अध्यक्ष पुष्पकमल दाहाल प्रचण्डलाई एउटै लहरमा कुर्सीको व्यवस्था गरिएको छ ।
यसअघिका बैठकहरुमा प्रचण्डलाई अरु नेताहरुसँगै राखिएको थियो । प्रधानमन्त्री केपी शर्मा ओलीले शनिबार अपराह्न सचिवालय बैठकको पूर्वसन्ध्यामा शीतलनिवास पुगेर राष्ट्रपति विद्यादेवी भण्डारीसँग भेट गरेका छन् ।
राष्ट्रपतिलाई भेट्न प्रधानमन्त्री अपराह्न साढे ४ बजे शीतलनिवास पुगेका थिए । राष्ट्रपति र प्रधानमन्त्रीवीच करिब ३५ मिनेट कुराकानी भएको स्रोतले बतायो ।
नेकपा सचिवालयको बैठक बेलुका ४ बजेका लागि तोकिएको थियो । तर, बैठक साढे ५ बजेका लागि सारिएको थियो । यसवीचमा प्रधानमन्त्रीले राष्ट्रपतिलाई भेटेका हुन् ।
राष्ट्रपतिलाई भेटेर बालुवाटार फर्किएपछि प्रधानमन्त्रीले अर्का अध्यक्ष प्रचण्डसँग केहीबेर अलग्गै कुराकानी गरेका थिए । प्रचण्डसँगको कुराकानी लगत्तै सचिवालय बैठक सुरु भएको छ ।
प्रधानमन्त्रीले सरकारको नियमित कार्यसूची अन्तरगत राष्ट्रपतिसँग भेट गरेको शीतलनिवासले दावी गरेको छ । नेकपाको बैठकअघि भएको यो भेटलाई राजनीतिक अर्थमा समेत हेरिएको छ ।
अहिले बालुवाटारमा नेकपाको सचिवालय बैठक जारी छ । बैठकमा अध्यक्षद्वय ओली र प्रचण्डको कुर्सी एकै लहरमा राखिएको छ ।
