पोखरा महानगर क्षेत्रका विद्यालयहरुलाई अनलाइन कक्षाहरु सञ्चालन नगर्न निर्देशन
कोरोना भाइरस (कोभिड–१९) को संक्रमण फैलिन नदिन लागू गरिएको लकडाउन लम्बिँदै गएपछि विद्यालयले ‘अनलाइन कक्षा’ सञ्चालन गर्न थालेका छन् ।
तर पोखरा महानगरपालिकाले भने आफ्नो क्षेत्रका विद्यालयहरुलाई अनलाइन कक्षाहरु सञ्चालन नगर्न निर्देशन दिएको छ । महानगर शिक्षा शाखाले बिहीबार विज्ञप्ति जारी गरी अनलाइन कक्षाहरु सञ्चालन नगर्न भनेको हो ।
महानगरभित्रका केही संस्थागत विद्यालयले आवश्यक प्रक्रिया र पूर्वाधारबिनै कक्षा सञ्चालन गरेको भन्दै महानगरले अनमुति बिना कक्षा सञ्चालन नगर्न सूचना जारी गरेको हो ।
‘कुनै प्रक्रिया र पूर्वाधार पनि छैन । अनलाइन कक्षाको नाममा नर्सरी, एलकेजीका विद्यार्थीलाई मानसिक तनाव पनि दिनुहँदैन,’ पोखरा महानगर शिक्षा शाखा प्रमुख गंगाबहादुर गुरुङले अनलाइनखबरसँग भने, ‘प्रक्रिया र पूर्वाधार नपुगेको कक्षाले विद्यार्थीलाई ज्ञान होइन झनै मानसिक तनाव थोपर्छ ।’
उनले कक्षा ९ भन्दा मुनीका कक्षाहरुमा अनलाइन क्लास सञ्चालन नगर्न आग्रह गरे । उनले एसईई र माथिल्लो कक्षाको हकमा भने कुनै रोकतोक नभएको सुनाए ।
गुरुङले अनलाइन कक्षा सञ्चालन गर्दा महानगरदेखि स्वीकृति लिएर मात्रै सञ्चालन गर्न आग्रह गरेका छन् । ‘महानगर नै भएपनि अहिले प्राय गाउँ फर्किएका छन् ।
सबै इन्टरनेटको पहुँचमा छैनन्,’ उनले भने, ‘अनलाइन कक्षा शःशुल्क हो कि निःशुल्क हो ? सबै खुलाएर महानगरसँग अनमुति लिन भनेका छौं ।’
