बेरोजगारलाई रोजगारी दिन ११ अर्ब खर्च गर्ने तयारी
सरकारले आगामी आर्थिक वर्षमा प्रधानमन्त्री रोजगार कार्यक्रममा ११ अर्ब २८ करोड ५५ लाख रुपैयाँ खर्च गर्ने तयारी गरेको छ। श्रम रोजगार तथा सामाजिक सुरक्षा मन्त्रालयले अर्थ मन्त्रालयलाई उक्त बजेटका लागि प्रस्ताव समेत गरिसकेको छ।
चालू आर्थिक वर्षमा ७५ हजारलाई एक सय दिनको रोजगारी दिने लक्ष्य दिए पनि कोरोना संक्रमणको कारण उक्त कार्यक्रम रोकिएपछि आगामी आर्थिक वर्षमा सरकारले १ लाख बेरोजगारलाई १ सय दिनको रोजगारी र ३० हजारभन्दा बढीलाई पारिश्रमिक नै दिएर तालिम दिने तयारी गरेको हो।
चालू वर्षमा ५ अर्ब रुपैयाँ प्रधानमन्त्री रोजगार कार्यक्रमअन्तर्गत सरकारले राखेको थियो। तर विनियोजित उक्त रकम पनि सरकारले खर्च गर्नसकेको छैन।
आगामी आर्थिक वर्षमा खर्च गरिने भनेको बजेट नेपालको आफ्नै स्रोतबाट ५ अर्ब ३७ करोड १४ लाख र विश्व बैंकको सहुलियतपूर्ण ऋणको ५ अर्ब ९१ करोड ४१ लाख रुपैयाँ हो।
उक्त रकमले १ लाख जनालाई अनौपचारिक क्षेत्रमा १ सय दिनको रोजगारी प्रदान गरिनेछ। त्यस्तै बाँकी रकम भने तालिममा प्रदान गरिनेछ।
