कोरोना महामारीले विश्वभरी भोकमरीको संकट आउन सक्ने : डब्ल्यूएफपी
विश्व यतिबेला कोरोना माहामारीको चपेटामा परेको अवस्थामा संयुक्त राष्ट्रसंघको विश्व खाद्य कार्यक्रम (डब्ल्यूएफपी) ले कोरोना भाइरसको कारण विश्वभरी भोकमरीको संकट आउन सक्ने बताएको छ ।
डब्ल्यूएफपीका प्रमुख डेभिड बियसलीले भोकमरीको संकट आउन नदिन हामीले अहिले देखि नै तत्काल त्यसबाट बच्ने कदम शुरु गर्नुपर्ने बताएका हुन् ।
यूएनको सुरक्षा परिषद्को बैठकमा बोल्दै बियसलीले समग्र विश्वभर यो संकट आउन नदिन छिटोभन्दा छिटो आवश्यक कदम चाल्नुपर्ने बताए ।
एक प्रतिवेदनले विश्वभर भोकमरीको सामना गर्नेको संख्या १३ करोड ५० लाखबाट बढेर २५ करोड पुग्न सक्ने देखाइसकेको छ ।
डब्ल्यूएफपीका अनुसार युद्धको मारमा परेका, आर्थिक संकटमा परेका र जलवायु परिवर्तनको समस्या सामना गरिरहेका १० मुलुकमा भोकमरीको जोखिम उच्च देखिएको छ ।
यमन, कंगो, अफगानिस्तान, भेनेजुयला, इथियोपिया, दक्षिण सुडान, सिरिया, नाइजेरिया र हाइटी सबैभन्दा प्रभावित बन्न सक्ने डब्ल्यूएफपीले बताएको छ ।
गत वर्ष दक्षिण सुडानमा जनासंख्याको ६१ प्रतिशतले खाद्य संकटको सामना गरेका थिए । त्यसका साथै पूर्वी अफ्रिका र दक्षिण एसियामा पनि खाद्य अभाव हुन सक्ने बताइएको छ ।
उनले यो संकट केही महिनासम्म रहने बताएका छन् । उनले यसबाट बच्नका लागि आफूहरुसँग कुनै समय नरहेको बताएका छन् ।बीबीसी
