सरकारको समेत स्वामित्व रहेको होटेल हायात रिजेन्सीलाई बन्द गर्ने घोषणा
सरकारको समेत स्वामित्व रहेको हायात रिजेन्सी होटेल असारसम्म बन्द हुने भएको छ । ९ चैतबाट व्यवसायिक संचालन बन्द रहेको यो होटेलले आइतबार एक सूचना प्रकाशित गर्दै होटेल १६ असार २०७७ (३० जुन २०२०) सम्म बन्द हुने जानकारी गराएको हो ।
होटेलले हायात रिजेन्सी काठमाडौंका सम्पूर्ण कामदार, कर्मचारी र व्यवस्थापकलाई १६ असारसम्म जगेडामा राख्ने निर्णय गरेको महाप्रवन्धक रामदासको भनाइ छ । जगेडामा रहेको अवधिमा कर्मचारी तथा श्रमिकले आधा तलव पाउने भएका छन् ।
लकडाउन खुलेको अवस्थामा पनि होटेल पूर्ण रुपमा सुरक्षित र व्यवसायिक रुपमा संचालन गर्न नसकिने भन्दै होटेल असारसम्म नै बन्द गर्ने निर्णय भएको होटेलका महाप्रवन्धक राजेश रामदासले उल्लेख गरेका छन् ।
कार्यस्थलमा संक्रामक रोगको रोकतथा तथा नियन्त्रणको समुचित व्यवस्था नभएसम्मका लागि होटेल बन्द गर्नु परेको उनको भनाई छ । कर्मचारी समेत होटेल सम्म आउन सक्ने सुनिश्चितता नभएको भन्दै होटेल बन्द हुने अवधी बढाइएको होटेलले जनाएको छ ।
परिस्थितिको मूल्यांकन गर्दै आगामी दिनमा थप निर्णय लिन सकिने व्यवस्थापनले उल्लेख गरेको छ । लकडाउनपछि व्यवसायिक रुपमा सेवा दिन सम्भव नभएपछि संचालन बन्द भएका ठूला र तारे होटेलहरुमध्ये हायातले सबै सेवा रोकेको घोषणा गरेको हो ।
अन्य पाँचतारे होटेलमा भने आपतकालीन समयमा सेवा दिने गरी कर्मचारीको व्यवस्थापन गरेका छन् ।
