रातको समयमा उपत्यका छाड्ने क्रम बढेपछि गृहमन्त्रालयद्वारा कडाइ, सवारी साधन नियन्त्रणमा
देशभर लकडाउन घोषणा गरिएको भएतापनि यसलाई उल्लंघन गरेर रातको समयमा उपत्यका छाड्ने क्रम बढेपछि सरकारले चेकजाँचमा कडाइ गरेको छ ।
संघीय सरकारको गृह मन्त्रालयले चेकजाँचमा थप कडाइ गर्न निर्देशन दिएको छ । यस्ता कार्य गर्ने सवारीलाई नियन्त्रणमा लिने र चालकको अनुमती पत्र समेत खोस्नेसम्म कारवाही गरिने सरकारको तयारी रहेको छ ।
सरकारले लकडाउन घोषणा गरे पनि रातको समयमा ठूलो संख्यामा मजदुरले उपत्यका छाडिरहेकोबारे बिभन्न संचारमाध्यममा समाचारहरु आएपछि भएको थियो ।
मन्त्रालयका उपसचिव उमाकान्त अधिकारीका अनुसार सर्वसाधारणको आवतजावतले संक्रमणको जोखिम बढ्ने भएकाले पूर्ण नियन्त्रण गर्न निर्देशन दिइएको छ । ‘जो जहाँ हुनुहुन्छ, त्यहीँ बस्न भनेका छौं’, अधिकारीले भने ।
गृहको निर्देशनपछि गएराति बल्खुबाट ६० जना भन्दा बढीलाई फर्काइएको ललितपुर प्रहरी परिसर, जावलाखेलका प्रमुख टेकप्रसाद राईले बताए ।
महानगरीय प्रहरी प्रभाग, कोटेश्वरकी प्रमुख प्रहरी निरीक्षक सुभद्रा वाइबाले कोटेश्वरबाट रातिको समयमा जान खोज्ने मजदुरलाई रोक लगाइएको बताइन् ।
उनका अनुसार काठमाडौंमा खान नपाएर भोकै बस्नु पर्ने अवस्था भए प्रहरी कन्ट्रोल १०० मा फोन गर्न भनिएको छ ।
साथै, स्थानीय तहले पनि वडा कार्यालयमार्फत राहत सहयोग वितरण गरिरहेको प्रहरीले मजदुरलाई बताएका छन् ।
