प्रदेश १ मा कर्फ्यु लगाउने तयारी, CDO र संचारकर्मीसँग मुख्यमन्त्रीको छलफल
लकडाउन तोड्ने क्रम नरोकिएपछि कर्फ्यु लगाएर भएपनि लकडाउन प्रभावकारी बनाउने तयारीमा प्रदेश सरकार जुटेको छ । मुख्यमन्त्री शेरधन राईले आवश्यक परे कर्फ्यु नै लगाउन प्रमुख जिल्ला अधिकारीहरुलाई निर्देशन दिएका हुन् ।
प्रजिअहरुसँगको छलफलपछि सोमबार मुख्यमन्त्री कार्यालयमा सञ्चारकर्मीहरुसँगको छलफलमा मुख्यमन्त्री राईले लकडाउन तोड्ने क्रम नरोकिए कर्फ्यु लगाउनेसम्मको तयारी गर्न प्रदेश भरीका जिल्लाका प्रमुख जिल्ला अधिकारीहरुलार्ई निर्देशन दिएको जानकारी दिए ।
कोरोना संक्रमणको जोखिम कम गर्न लगाइएको लकडाउन प्रभावकारी नभएको जानकारी आएको उनले बताए । लकडाउनलाई कडाइपूर्वक कार्यान्वयनको लागि आवश्यक परे कर्फ्यु लगाउन निर्देशन दिएको बताए ।
छलफलमा उपस्थित मोरङका प्रमुख जिल्ला अधिकारी मदन भुजेललाई मुख्यमन्त्री राईले भने, ‘लकडाउन प्रभाबकारी बनाउनैपर्छ, तोड्ने क्रम नरोकिए कर्फ्यु लगाउनुहोला ।’
लकडाउन केवल बाहिर हिँड्दा मात्र लागु हुने विषय नभएको मुख्यमन्त्री राईले बताए । लकडाउनको समयअवधिभर बस्दा र सामाजिक रुपमा पनि दुरी बनाउने र अनुशासनमा बस्ने विषय हो भन्ने कुरा पनि बुझाउन जरुरी भएको भएको मुख्यमन्त्रीको भनाई थियो ।
मानिसहरु सडकमा नसिस्किएको भएपनि सहि रुपमा क्वारेन्टाइनको अभ्यास नगरेकोतर्फ पनि सरकारले अब ध्यान दिने उनले बताए ।
प्रदेश १ मा पछिल्लो समय भारत तथा अन्य तेस्रो मुलुकबाट धेरै व्यक्तिहरुको प्रवेश भएकोले उच्च जोखिममा रहेको भन्दै मुख्यमन्त्री राईले त्यसप्रति प्रदेश सरकार सचेत र संवेदनशिल रहेको बताए ।
अहिले प्रदेशमा २ हजारलाई राख्नसक्ने क्वारेन्टाइन निर्माण भएको जानकारी उनले दिए । उनले एक हजार क्वारेन्टाइका वेडहरु नेपाली सेनाको सुरक्षामा सञ्चालन गर्नेगरी व्यवस्थापन मिलाएको बताए ।
स्वास्थ्यकर्मीहरुको सुरक्षाका लागि सुरक्षा भत्ताको प्रवन्ध गरेको, प्रदेशमै कोरोना परीक्षण गर्ने ल्याव सञ्चालनमा आएको, कारोना उपचार अस्पताल दुई दिनभित्रमा सञ्चालन गर्ने तयारी भइरहेको जानकारी पनि मुख्यमन्त्री राईले दिए ।
उनले सुरक्षाकर्मीहरुको परिचालनका लागि १ करोड ६८ लाख रुपैयाँ रकम निकासा गरिसकेको पनि जानकारी दिए । अप्ठ्यारो समयमा सञ्चार क्षेत्रबाट राम्रो सहयोग भइरहेको र यतिबेला मिडिया स्वयं पनि समस्यामा रहेको विषयमा सरकारलाई जानकारी भएको मुख्यमन्त्री राईले बताए ।
उनँले सञ्चार क्षेत्रको समस्यामा सरकार सहयोग गर्न तत्पर रहेको भन्दै त्यस विषयमा जानकारी माग समेत गरे । छलफलका क्रममा नेपाल पत्रकार महासंघ प्रदेश १ का अध्यक्ष बिक्रम लुईटेलले प्रदेशका २७ वटा दैनिक पत्रिकाहरु बन्द भएको, सञ्चार क्षेत्रमा पनि लकडाउनको प्रभाव परेको जानकारी दिँदै सरकारले त्यस विषयमा ध्यान दिनुपर्ने बताए ।
उनले लकडाउन उल्लंघनको क्रमलाई सरकारले कडाइपूर्वक रोक्नु पर्ने सुझाव दिए ।
महासंघ प्रदेशका महासचिव विवेक गौतमले सञ्चार क्षेत्रको समस्याका बारेमा कोरोना समस्या समाधान भएपछि छलफल गर्ने भन्दै अहिले सरकारले संक्रमण रोकथामका लागि गरेका प्रयासमा सहयोग गर्नु आवश्यक रहेको बताए ।
उनले प्रिन्ट मिडिया बन्द भएपनि विद्युतीय र डिजिटल मिडियामार्फत सूचना प्रवाह गर्ने काम भइरहेकोले सरकारले त्यसको उपयोगमा ध्यान दिनुपर्ने सुझाव दिए । प्रदेश सरकारले सूचनामा एकद्वार प्रणाली लागू गर्न हरेक मन्त्रालयमा कोरोना फोकल पर्सन तोकेको र उनीहरुले हरेक दिन ४ बजे मुख्मन्त्रीको कार्यालयमा प्रतिवेदन पठाउने गरी व्यवस्था मिलाएको छ ।
सबै ठाउँबाट आएको सूचना प्रशोधन गरेर मुख्यमन्त्रीको कार्यालयमा रहेको सञ्चार डेस्कले सबैलाई औपचारिक सूचना प्रवाह गर्ने प्रणालीको विकास गरेको मुख्यमन्त्री राईले जानकारी दिए ।
जनचेतनामूलक सूचनाहरुलाई विभिन्न माध्यमबाट प्रशारण र प्रकाशन गर्ने विषयमा सरकारले भोलिबाटै काम थाल्ने जानकारी मुख्यमन्त्री राईले दिए ।
उनले विपन्न र श्रमिक वर्गको पहिचान गरी उनीहरुको तथ्यांक संकलन गर्ने र राहात वितरण गर्ने काममा लाग्न सबै स्थानीय तहलाई निर्देशन गरिसकेको बताए । उनले राहात वितरण गर्ने काम स्थानीय तहको भएको भन्दै स्थानीय तहले नसकेको अवस्थामा मात्र प्रदेश र संघीय सरकारले त्यस विषयमा ध्यान दिने बताए ।
