नेपाल-भारतको सिमा नाका अनिश्चितकालका लागि शील गरिँदै, गृहमन्त्री र क्वात्राबीच भेटवार्ता
कोरोनाको त्रासवीच अनिश्चितकालका लागि नेपाल-भारतको सिमा नाका शील गरिने भएको छ । आइतबार नेपालका लागि भारतीय राजदूत विनयमोहन क्वात्राले गृहमन्त्री रामबहादुर थापा ‘बादल’ सँग आइतबार शिष्टाचार भेटवार्ता गरेका हुन्।
भेटमा मन्त्री थापाले विश्व्यापीरुपमा फैलिएको कोरोना भाइरस (कोभिड–१९) को महामारीसँग जुध्न सार्क राष्ट्रका मुलुकहरुबीच सहकार्यको आवश्यकतामा जोड दिए ।
यसै सन्दर्भमा नेपाल-भारत सीमाबाट सो महामारी नफैलियोस् भनेर सीमा नियन्त्रणमा दुबै देशको समझदारी र सहकार्यका लागि गृहमन्त्री थापाले राजदुत क्वात्रामार्फत भारत सरकारसँग आग्रह गरे ।
राजदुत क्वात्राले नेपाल-भारत सम्बन्धको ऐतिहासिक सम्बन्धको चर्चा गर्दै आफ्नो कार्यकालमा सो सम्बन्धलाई थप मजबुत बनाउन सक्दो भूमिका खेल्ने प्रतिवद्धता गरे ।
राजदूत क्वात्राले कोरोना भाइरस विरुद्धको लडाइँमा नेपाललाई आवश्यक सबै सहयोग गर्न भारत तयार रहेको बताए ।
कोरोनाको त्राससपछिको अवस्थामा नेपाल-भारत सीमा व्यवस्थापनको सम्बन्धमा दुई देशका परराष्ट्रमन्त्रीबीच पनि छलफल भइसकेको तथा नेपालको गृह मन्त्रालयको समेत राय लिएर निर्णय गर्न आफूहरु तयार रहेको बताए ।
उनले भारतीय सहयोगमा काभ्रेको पनौतिमा बन्न लागेको नेपाल प्रहरीको तालिमकेन्द्र निर्माणको काम र सुरक्षाकर्मीलाई सवारी सधान उपलब्ध गराउने विषयलाई आफूले प्राथमिकतामा राख्दै यसलाई छुट्टै द्रुतमार्गबाट अघि बढाउने जानकारी गराए ।
गृहमन्त्रालयमा भएको भेटवार्ता दुई देशबीचको सम्बन्ध, आपसी सहकार्य र सहयोगको विषयमा छलफल भएको छ ।
नेपालमा भारतीय राजदूत रुपमा कार्यभार सम्हालेका राजदुत क्वात्रालाई बधाई तथा सफल कार्यकालको शुभकामना दिँदै गृहमन्त्री थापाले उनको कार्यकालमा २ देशको सम्बन्धले थप उचाई लिने विश्वास व्यक्त गरे ।
गृहमन्त्री थापाले नेपालको विविध क्षेत्रका साथै सुरक्षा निकायको तालिम र भौतिक सामाग्रीमा भारतले गर्दै आएको सहयोगप्रति राजदूत क्वात्रार्फत भारत सरकारलाई धन्यवाद व्यक्त गर्दै आगामी दिनमा पनि त्यसले निरन्तरा पाउने विश्वास व्यक्त गरे ।
