चीनबाट फर्केका निवर्तमान राजदूत लीलामणि पौड्याल दुई साताका लागि ‘क्वारेन्टाइन’ मा
चीनका लागि नेपालका निवर्तमान राजदूत लीलामणि पौड्याल बुधबार स्वदेश फर्केलगत्तै राजधानी काठमाडौंस्थित निवासमा ‘सेल्फ क्वारेन्टाइन’ बसेका छन् । दुई साताको अवधि अध्ययन, चिन्तन–मननमा व्यतीत गर्ने उनले बताए ।
पौड्यालले आफू दुई साता सेल्फ क्वारेन्टाइनमा रहने र त्यसपछि मात्र घरबाट बाहिर निस्कने बताएका छन् । ‘बुधबार बेइजिङबाट फर्केँ, त्यसपछि दुई साताका लागि सेल्फ क्वारेन्टाइनमा छु,’ निवर्तमान राजदूत पौड्यालले फोनमा कुराकानी गर्दै भने, ‘त्यसवेलासम्म म कसैसँग भेट्दिनँ, बाहिर पनि निस्कन्नँ ।’
चीनसहित कोरोना भाइरस संक्रमित मुलुकबाट फर्केका सबै नागरिकलाई दुई साता सेल्फ क्वारेन्टाइनमा रहन सरकारले आग्रह गरेको थियो । स्वस्थ नै रहे पनि साधारण नागरिकका रूपमा निवर्तमान राजदूत पौड्याल सरकारी आग्रह स्वीकार गर्दै ‘सेल्फ क्वारेन्टाइन’मा बसेका हुन् ।
सरकारले १८ फागुनमा दुई साताभित्र स्वदेश फिर्ता गर्ने निर्णय गरेपछि पौड्याल बुधबार स्वदेश फर्केका थिए । कार्यकालको तीन वर्ष चार महिना पाँच दिनमा उनी फर्केका हुन् ।
स्वदेश फर्किनुअघि मंगलबार बेइजिङबाट वक्तव्य जारी गरी पौड्यालले दुई देशबीच उच्चस्तरीय भ्रमण आदानप्रदान, बिआरआईमा नेपालको प्रवेशलगायत अनेकौँ सहमतिमा सहभागी भएको बताएका थिए ।
यसैगरी आफ्नो कार्यकालमा जानी-जानी कुनै गल्ती नगरेकोसमेत उनले जिकिर गरेका थिए । उनले मंगलबार जारी भएको विज्ञप्तिमा उल्लेख भएका विषयबाहेक आफूले भन्नुपर्ने विषय तत्कालका लागि केही नभएको नयाँ पत्रिकालाई बताए ।
