कतारले निषेध गरेको क्षेत्रमा कुनैपनि नेपालीलाई नजान दूतावासको आग्रह
कतारस्थित नेपाली दूतावासले कतार सरकारले जारी गरेको सबै प्रकारका निर्देशनहरुको अक्षरश पालना गर्न त्यहाँ रहेका नेपाली समुदायलाई आग्रह गरेको छ । नेपाली दूतावास (दोहा)ले विज्ञप्ति जारी गर्दै यस्तो आग्रह गरेको हो ।
“कतार सरकारले तोकेका निषेधित क्षेत्रहरुमा नजान वा भेला नहुन, श्रमिकहरुको आवासीय क्षेत्रको आसपास सप्ताहन्तलगायत अन्य समयमा अवैधरुपमा पसल राखी सामानहरुको किनबेच गर्ने पाइएको र सो कुरालाई कतार सरकारले बन्देज गरेको हुँदा कम्पनीको आधिकारिक व्यक्तिसँग तोकिएको संख्या (२ जना) मा आधिकारिक स्थानहरुबाट मात्र किनमेल गर्नुहुन,” जारी विज्ञप्तिमा भनिएको छ ।
“कोरोनाभाइरसको संक्रमणको जोखिमलाई न्यूनीकरण गर्ने उद्देश्यले कतार सरकारले अपनाएका सबै प्रकारका उपायहरुको अवलम्बन गर्नु–गराउनु, जारी गरेका निर्देशनहरुको पालना गर्नु–गराउनु हामी सबैको कर्तव्य हो,” विज्ञप्तिमा भनिएको छ ।
