क्यानडेली प्रधानमन्त्री पत्नीलाई कोरोना भाइरस भएको पुष्टि, दुवै जना १४ दिने आइसोलेशनमा
क्यानाडाका प्रधानमन्त्री जस्टिन ट्रुडोकी श्रीमती सोफीलाई कोरोना भाइरस लागेको पुष्टि भएपछि १४ दिने आइसोलेशनमा राखिएको छ ।
क्यानडेली प्रधानमन्त्रीका सञ्चार निर्देशकले एक विज्ञप्ति जारी गर्दै प्रधानमन्त्री पत्नी सोफीलाई कोरोना भएको जनाएका छन् ।
प्रधानमन्त्री ट्रुडोकी श्रीमती सोफीलाई कोरोना भाइरस (कोभिड–१९) भएको पुष्टि भएपछि दुवै जनालाई १४ दिने निगरानीमा राखिएको बीबीसीले जनाएको छ । तर ट्रुडोमा अहिलेसम्म कुनै सङ्क्रमण नदेखिएकाले उनको कोरोना परीक्षण नहुने बताइएको छ ।
सोफियामा कोरोना संक्रमण देखिए पनि उहाँले असजिलो महसुस गर्नु भएको छैन,’ त्यहाँका प्रधानमन्त्रीका सञ्चार निर्देशकद्वारा जारी विज्ञप्तिमा भनिएको छ ।
सेल्फ–आइसोलेसनमा रहे पनि प्रधानमन्त्री ट्रुडोले पूर्ववत् ढंगले आफ्ना नियमित काम गर्ने उनको कार्यालयले जनाएको छ । यसैसन्दर्भमा उनले शुक्रबार आफ्ना नागरिकहरूलाई सम्बोधन गर्ने तय भएको छ ।
विश्वव्यापी रूप लिइरहेको कोरोनाले क्यानडामा १ जनाको मृत्यु भइसकेको छ । देशका विभिन्न क्षेत्रका १४२ नागरिकमा कोरोनाको यसको देखिएको छ । बिहीबार मात्रै त्यहाँका ३२ जनामा कोरोनाको संक्रमण देखिएको छ ।
यसैबीच अहिलेसम्म १ सय २७ देशका १लाख ३४ हजार ७ सय दुई जनामा कोरोनाको सङ्क्रमण भएको पाइएको छ । सङ्क्रमितमध्ये ७० हजार ३ सय ८१ जना उपचारपछि निको भएका र ५९ हजार ३ सय ४२ जना उपचाररत छन् ।
कोरोनाका कारण अहिलेसम्म ४हजार ९ सय ७९ जनाको मृत्यु भइसको छ ।
