अदालतमा आत्मसमर्पण गरेका सिद्धबाबालाई झुम्का कारागार चलान
बलात्कारका आरोपी सिद्धबाबा भनिने कृष्णबहादुर गिरीले आत्मसमर्पण गरेका छन् ।
गिरीले जिल्ला अदालत सुनसरीमा पुगेर मंगलवार आत्मसमर्पण गरेका हुन् ।
जिल्ला अदालत सुनसरीबाट धरौटीमा छुटेपनि उच्च अदालत विराटनगरले उनलाई पुर्पक्षका लागि जेल चलान गर्न आदेश दिएको थियो ।
सोही आदेशपछि पक्राउ पर्ने डरले सिद्धबाबा अदालतमा हाजिर भएका हुन् ।
अदालतमा आत्मसमर्पणपछि उनलाई झुम्का कारागार चलान गरिएको जिल्ला प्रहरी कार्यालय सुनसरीका प्रवक्ता प्रहरी नायब उपरीक्षक (डीएसपी) विनोद शर्माले जानकारी दिए ।
‘उहाँ अदालतमा उपस्थित हुनुभएको रहेछ, त्यहाँबाट पक्राउ गरी उहाँलाई झुम्का कारागार चलान गरिएको छ,’ डीएसपी शर्माले भने ।
