रेल्वे कम्पनीका लागि दक्ष प्राविधिकसहित २२६ कर्मचारी थपिने
नेपाल सरकारले दक्ष प्राविधिकसहित २२६ कर्मचारी धनुषाको कुर्था देखि भारतको जयनगरसम्म रेल सञ्चालनका लागि थप गर्ने भएको छ ।
उक्त रेल्वे कम्पनीमा अहिले जनशक्ति ज्यादै न्यून रहेकाले आबश्यकताको आधारमा थप गर्न लागिएको हो । एक जना प्रमुखसहित रेल सञ्चालन र मर्मत लगायतका कामका लागि इञ्जिनीयरिङ क्षेत्रका जनशक्ति आवश्यक परेको छ । साथै प्रशासन, लेखा लगायतका कर्मचारी आवश्यक भएको रेल विभागले जनाएको छ ।
मन्त्रिपरिषद्बाट भने गत महिना नै कर्मचारीका लागि स्वीकृति दिइसकेको महानिर्देशक बलराम मिश्रले बताएका छन् । सञ्चालक समितिले पास गरेपछि विज्ञापनमार्फत कर्मचारी पूर्ति गर्ने तयारी रहेको छ ।
उनले भने, ‘कम्पनीमा अहिले महानिर्देशक नभएकाले हामीले नै पदपूर्तिको प्रक्रिया अघि बढाएका छौँ ।’ रेल सञ्चालनका लागि रेलमार्ग निर्माण सम्पन्न भइसकेको छ भने रेल सेट निर्माण सकिएको विभागले जनाएको छ ।
सरकारले अहिले दुई सेट खरिद गर्दा त्यसमा जम्मा १० डिब्बा रहन्छन् । यी दुई सेटको क्षमता एक हजार २०० सम्म यात्रु बोक्ने रहेको छ । भारतबाट हिँडेको रेल सेट झण्डै १० दिनमा नेपाल आइपुग्ने रेल विभागले जनाएको छ ।
सरकारले भारतीय सरकारी कम्पनी कोनकान कम्पनीमार्फत रेल सेट खरिद प्रक्रिया अघि बढाएको थियो । सो रेल सेट आइपुगेको केही समयपछि सञ्चालन गर्न सकिने उनले बताए । दुई सेट खरिद गर्न लागिएकामा पहिलो सेट आइपुगेको केही समयपछि अर्को आइपुग्ने महानिर्देशक मिश्रले बताए ।
भारतको जयनगरबाट धनुषाको कुर्थासम्म ३५ किलोमिटर लम्बाइको यो रेलमार्गका अरु भौतिक पूर्वाधार निर्माण भइसकेको छ ।
