युरोपेली लगानी बैंकले विद्युत वितरण प्रणालीलाई १२ अर्ब रुपैयाँ ऋण दिने
विद्युत् वितरण प्रणाली स्तरोन्नती तथा विस्तार आयोजनाका लागि युरोपेली लगानी बैङ्कले दिने १२ अर्ब ४१ करोड ऋण दिने भएको छ । ऋण सहायता प्राप्त गर्ने सम्बन्धी वित्तीय सम्झौतामा हस्ताक्षर भएको छ ।
सम्झौतामा उल्लेखित प्रतिवद्धताको प्रभावकारिताका लागि सरकारका तर्फबाट अर्थ मन्त्रालय, अन्र्तराष्ट्रिय आर्थिक सहायता समन्वय महाशाखाका सह–सचिव श्रीकृष्ण नेपालले र यूरोपेली लगानी बैंकका तर्फबाट उक्त बैंकका डाइरेक्टर मारिया स बारागन र लिगल काउन्सेल बोर्जा ओक्जाङ्गोइटीले हस्ताक्षर गरी मेलमार्फत आदान—प्रदान गरिएको छ ।
खासगरी प्रदेश नम्बर ५, कर्णाली र सुदूरपश्चिम प्रदेशमा त्यहाँका जनताको विद्युतमा पहुँच बढाउने, विद्युत आपूर्तिको गुणस्तर एवम् दक्षता बढाउने र ऊर्जा व्यापारलाई सहजीकरण गर्ने उद्देश्य रहेको विद्युत वितरण प्रणाली स्तरोन्नति तथा विस्तार आयोजना अघि बढाइएको हो ।
उक्त आयोजना आउँदो सन् २०२३ को डिसेम्वर सम्ममा सम्पन्न गर्ने लक्ष्य छ । नेपाल विद्युत प्राधिकरणले कार्यान्वयन गर्ने प्रस्तुत आयोजना अन्तर्गत ३३/११ केभी भोल्टजका सवस्टेसनहरु तथा ३३ केभी भोल्टेजका आपूर्ति लाईनहरु निर्माण गर्ने, ११ किलो भोल्टका आपूर्ति लाईनहरु, वितरण ट्रान्सफर्मरहरु र न्यून भोल्टेजका आपूर्ति लाईनहरु निर्माण गरिनेछ ।
सो आयोजनामा नपुग हुने रकममध्ये ११२.३ मिलियन अमेरिकी डलर बराबरको ऋण सहयाता एशियाली पूर्वाधार लगानी बैंकबाट पनि सह—लगानीको रुपमा सम्मिश्रण गर्नका लागि वार्ता भइसकेको अर्थ मन्त्रालयले जनाएको छ ।
