नेविसंघ तदर्थ समितिको अध्यक्षमा राजीव ढुंगाना मनोनित
त्रिभुवन विश्वविद्यालयले स्वतन्त्र विद्यार्थी यूनियनको चुनावी मिति घोषणा गरेपछि नेपाली कांग्रेसले निष्क्रिय अवस्थामा रहेको नेविसंघ तदर्थ समितिको अध्यक्षमा राजिव ढुंगानालाई मनोनयन गरेको छ ।
कांग्रेस शीर्ष नेताहरुबीच गत शुक्रबार भएको सहमतिअनुसार सुनसरीका स्थायी बासिन्दा ढुंगानालाई आज सभापति शेरबहादुर देउवाले अध्यक्षमा मनोनीत गरेका हुन् ।
देउवाले काठमाडौंका मनोज वैद्य र पाल्पाकी महेश्वरी कुँवरलाई नेविसंघको महामन्त्रीमा मनोनीत गरेका छन । नेविसंघको तदर्थ समिति १ सय २७ सदस्यीय बनाउने सहमति छ।
संघ तदर्थ कार्यसमितिका बाँकी पदाधिकारी र सदस्यहरुको मनोनयन पनि चाँडै हुने कांग्रेस केन्द्रीय कार्यालयका सचिव कृष्णप्रसाद पौडेलले जानकारी दिए ।
नवगठित तदर्थ समितिले मनोनीत भएको मितिले ६ महिनाभित्र नेविसंघको १२ औं केन्द्रीय अधिवेशन गराउनु पर्नेछ । अर्कातर्फ त्रिविले आगामी फागुन १४ गतेका लागि स्ववियू चुनावको मिति सार्वजनिक गरेकाले त्यसको तयारीमा समेत जुट्नु पर्नेछ ।
