साहको मृत्यु हुनुमा चिकित्सकको नभई अस्पतालको कमजोरी देखिएको मेडिकल काउन्सिलको निष्कर्ष
सहिद गंगालाल राष्ट्रिय हृदय केन्द्रमा सर्लाहीकी पाँच वर्षीया आकृतिकुमारी साहको मृत्यु हुनुमा चिकित्सकको नभई अस्पताल व्यवस्थापनको कमजोरी देखिएको नेपाल मेडिकल काउन्सिलले निष्कर्ष निकालेको छ ।
साहको वैशाख १७ गते शल्यक्रिया हुँदा गलत समूहको रगत चढाएको पाँच दिनपछि मृत्यु भएको थियो । ‘ओ पोजेटिभ’ रगत भएकी बालिकालाई शल्यक्रियाका क्रममा ‘ए पोजेटिभ’ रगत चढाउँदा मृत्यु भएपछि त्यसको मेडिकल काउन्सिलले छानबिन गरेको थियो ।
‘बालिकाको शल्यक्रिया गर्नुअघि अस्पतालले व्यवस्था गर्नुपर्ने चेकलिस्टसमेत थिएन । ल्याबमा बस्नेले तयार गरेको विवरणकै आधारमा बालिकालाई रगत चढाइएको छ । सबैले ल्याबले दिने रिपोर्टलाई विश्वास गरेको देखिन्छ,’ मेडिकल काउन्सिलका रजिस्ट्रार कृष्णप्रसाद अधिकारीले भने, ‘बालिकाको मृत्यु हुनुमा चिकित्सकको कमजोरी देखिएन । अस्पताल व्यवस्थापनको कमजोरीले बालिकाको मृत्यु भएको पाइयो ।’ शल्यक्रिया गर्ने चिकित्सकको कमजोरी नभए पनि नैतिक जिम्मेवारी भने लिनुपर्ने भन्दै सचेतपत्र दिइएको उनले बताए । काउन्सिलले तयार पारेको प्रतिवेदनमाथि विज्ञ चिकित्सक संयोजक रहेको समितिमा समेत छलफल भइरहेको रजिस्ट्रार अधिकारीले बताए ।
सहन्यायाधिवक्ता, प्रहरी, स्वास्थ्य मन्त्रालयका ११ औं तहका कर्मचारीलगायत सदस्य रहेको उक्त समितिले अनुसन्धान गर्दा कसैको कमजोरी भेटिए मुद्दा चलाउन सरकारी वकिलको कार्यालयलाई सिफारिस गर्न सक्ने कानुनी व्यवस्था छ । यसअघि उच्च अदालत पाटनले यस घटनाका सम्बन्धमा मेडिकल काउन्सिल र सरकारी वकिल कार्यालयसँग समन्वय गरी अनुसन्धान प्रक्रिया अगाडि बढाउन आदेश दिएको थियो ।
यसैबीच अस्पतालका निर्देशक डा। चन्द्रमणि अधिकारीले उक्त शल्यक्रियामा आफ्नो कुनै संलग्नता नरहेको बताएका छन् । ‘म शल्यक्रियामा संलग्न थिइनँ । बेहोस बनाउने टिममा पनि थिइनँ । न त उनलाई चढाइएको रगत मेरो सिफारिसमा भएको हो,’ अधिकारीले भने, ‘यो घटनामा मेरो कुनै संलग्नता र कमजोरी नभएको भनेर काउन्सिलले पत्र दिइसकेको छ । मेरो बेइज्जत गर्न मात्रै यस्तो आरोप लगाइएको हो ।’ यसअघि पीडित पक्षले उक्त घटनाको छानबिन जारी रहेको भन्दै डा। अधिकारीलाई निर्देशक बनाइएकामा आपत्ति जनाएको थियो । कान्तिपुर दैनिकमा खबर छ ।
