विश्व ब्याटमिन्टन वरीयताको ११ औं स्थानमा उक्लिए प्रिन्स
काठमाडौं- नेपालका युवा ब्याटमिन्टन खेलाडी प्रिन्स दाहालले जुनियरतर्फको विश्व वरीयतामा तीन स्थान सुधार गरेका छन् ।
विश्व ब्याटमिन्टन महासंघले मंगलबार जारी गरेको ब्याटमिन्टन (जुनियरतर्फ) को वरीयतामा उनी ११ औं स्थानमा उक्लिएका हुन् । उनले ८ हजार ८ सय ४५ अंक पाएका छन् ।
गत साता उनी ७ हजार ४ सय ७५ अंकसहित १४ औं स्थानमा थिए ।
जुनियरतर्फ वरीयताको शीर्ष स्थानमा फ्रान्सका क्रिस्टो पोपोभ छन् भने दोस्रोमा चीनका लिउ लियाङ छन् ।
प्रिन्सले पछिल्लो समय ब्याटमिन्टनको जुनियरतर्फको प्रतियोगितामा उत्कृष्ट प्रदर्शन गरिरहेका छन् ।
उनी अघिल्लो साता काठमाडौंमा सम्पन्न प्रेसिडेन्ट कप इन्टरनेसनल ब्याडमिन्टन सिरिजअन्तर्गत यु-१९ को फाइनलमा पुगेका थिए । उनी फाइनलमा तेस्रो वरीयताका भारतका मेइराबा लुवाङसँग पराजित भएका थिए ।
