बाँकको कुसुममा बस दुर्घटना : १४ जना घाइते, चालक प्रहरीकाे नियन्त्रणमा
नेपालगञ्ज : बाँकेको राप्ती सोनारी गाँउपालिका-१, कुसुममा बस दुर्घटना हुँदा १४ जना घाइते भएका छन् ।
सोमबार बिहान दाङको तुल्सीपुरबाट नेपालगञ्जतर्फ आउँदै गरेको ना५ख ६४४९ नम्बरको बस ९ बजे अनियन्त्रित भई सडकबाट अन्दाजी ५० मिटर तल खसेको थियो । दुर्घटनामा बसमा सवार १४ जना घाइते भएको प्रहरीले जनाएको छ ।
घाइतेमध्ये रुकुमको चौरजहारी नगरपालिका १३ का ५३ वर्षीय दलबहादुर मल्ल र दाङको दंगीशरण गाउँपालिका-६ की ७२ वर्षीया विष्णु कुमारी नेपालीको अवस्था गम्भीर रहेको जनाइएको छ ।
घाइते सबैलाई उपचारका लागि नेपालगञ्ज मेडिकल कलेज, बाँके पठाइएको प्रहरीको भनाइ छ । बस चालकलाई प्रहरीले नियन्त्रणमा लिएको छ ।
