जुम्लाबाट ६ हजार ५०० मेट्रिक टन स्याउ निर्यात
खलङ्गा : जुम्लाबाट ६ हजार ५०० मेट्रिक टन स्याउ निर्यात गरिएको छ ।
विगत दुई वर्षयताकै स्याउबाट भित्रिने आर्थिक आम्दानीको रेकर्ड तोड्दै यस वर्ष रु ३४ करोड १८ लाख ८० हजार बराबरको स्याउ निर्यात भएको जिल्ला कृषि विकास कार्यालयका प्रमुख बालकराम देवकोटाले बताए ।
आर्थिक वर्ष २०७४/७५ मा रु १६ करोड र आव २०७५/७६ मा रु १७ करोड बराबरको स्याउ जिल्ला बाहिर गएको उनले जानकारी दिए ।
उनले भने, “दुई आवको तुलनामा यस वर्ष स्याउबाट करीब रु १७ करोड आम्दानी बढी भएको छ ।” पछिल्लो समय जुम्ली किसानको स्याउखेतीप्रति बढ्दै गएको आकर्षणका कारण पनि उत्पादन वृद्धि भइरहेको छ ।
जुम्लाका साढे १६ हजार घरधुरी स्याउखेतीमा निर्भर छन् । स्याउको आम्दानी हेर्दा कम्तीमा एक किसानले रु ४ देखि रु ६ लाख बराबर कमाएका छन् । तिला गाउँपालिका-१ का नर रावत र महेन्द्र बुढाले स्याउ निर्यातबाट करीब रु २ देखि रु ४ लाख कमाएको जानकारी दिए ।
