यस वर्षको दादा साहेब फाल्के पुरस्कार अमिताभ बच्चनलाई
यस वर्ष बलिउड मेगास्टर अमिताभ बच्चन दादा साहब फाल्के पुरस्कारबाट सम्मानित हुने भएका छन् । भारतीय सिनेमा क्षेत्रको सबैभन्दा ठूलो पुरस्कार मानिने दादा साहब फाल्के यो वर्ष अमिताभ बच्चनलाई प्रदान गरिने भएको हो ।
बलिउडमा आफ्नो ५० वर्ष पुरा गरिसकेका बच्चनलाई भारतीय सरकारका सूचना तथा प्रसारण मन्त्री प्रकाश जावडेकरद्वारा पुरस्कार प्रदान गर्ने जानकारी दिइएको हो ।
बिग बी अर्थात् अमिताभको पहिलो चलचित्र सात हिन्दुस्तानी हो जुन सन् १९६९ मा प्रदर्शनमा आएको थियो । सन् १९७३ मा प्रकाश मेहराको निर्देशनमा बनेको चलचित्र जन्जीर उनको पहिलो हिट चलचित्र हो । त्यसपछिका २ दशक उनी सबैभन्दा सफल नायकका रुपमा रहे ।
अहिले पनि सक्रिय रहेका अमिताभले ४ पटक राष्ट्रिय चलचित्र पुरस्कार जितेका छन् । उनले १५ वटा फिल्मफेयर अवार्डसहित धेरै पुरस्कार जितेका छन् । सन् २०१५ मा उनी पद्म विभूषणबाट सम्मानित भएका थिए । उमेरको यत्रो पढावमा पनि अमिताभले चलचित्र र टेलिभिजनमा निरन्तरता दिइरहेका छन् ।
