पाकिस्तानले पुन: लगायो भारतीय फिल्ममाथि प्रतिबन्ध
पाकिस्तानले भारतीय फिल्ममाथि पुन: प्रतिबन्ध लगाएको छ । सूचना तथा प्रसारणका लागि प्रधानमन्त्रीका विशेष सहायक डा. फिरदोस आशिक अवानले विज्ञप्ति जारी गर्दै पाकिस्तानमा कुनै पनि फिल्म प्रसारण नगर्न आग्रह गरेका हो ।
जम्मु कश्मीर राज्यलाई विशेष दर्जा दिने भारतको संविधानको धारा ३७० भारत सरकराले सोमबार खारेज गरेपछि पाकिस्तानले भारतसँग राजनीतिक तथा सांस्कृतिक सम्बन्ध कम गर्नको लागि कदम चालिसकेको छ ।
डा. फिरदोसले कश्मीरको पक्षमा पाकिस्तानले सबै किसिमको विकल्प अपनाउने बताएका छन् । उनले अन्तर्रा्ष्ट्रिय सञ्चार माध्यमलाई समेत कश्मीरको अवस्थाबारे जानकारी लिन आग्रह गरेका छन् । यसका साथै पाकिस्तानले कश्मीरको दुर्दशाको बारेमा उजागर गर्ने बताउँदै आएको छ ।
योभन्दा अगाडि पनि पाकिस्तानले भारतीय फिल्ममाथि प्रतिबन्ध लगाएको थियो । सन् २०१९ को फेब्रअरीमा भारतीय सेनाले गरेको हवाई प्रतिबन्ध ‘एयर स्ट्राइक’ पछि पाकिस्तानले भारतीय फिल्म रिलीज गर्न प्रतिबन्ध लगाएको थियो ।
पाकिस्तानका तत्कालीन सूचना तथा प्रशारण मन्त्री चौधरी फवाद हुसेनले बलिउड फिल्म प्रसारण नगर्न सूचना जारी गरेका थिए । उनले भारतीय फिल्मका साथसाथै ‘मेड इन इन्डिया’ विज्ञापन समेत बहिस्कार गरेको घोषणा गरेका थिए ।
यता, भारतले पनि ‘पुलवामा आग्रमण’ पछि पाकिस्तानी अभिनेता तथा अभिनेत्रीलाई भारतमा प्रतिबन्ध लगाउनुका साथै फिल्म रिलीज नगर्न निर्देशन दिइएको थियो ।
