‘मुसुमुसु हाँसिदेउ’ बोलको गीत गाउने लोकप्रिय गायक नोर्देनको निधन
‘मुसुमुसु हाँसिदेउ न लै लै’ गीत गाएका द हिमालयन ब्यान्डका गायक नोर्देन तेन्जिङ भुटियाको निधन भएको छ । उनको सोमबार बेलायतमा निधन भएको हो ।
सन् २००६ देखि उनी घाँटीको क्यान्सरले पीडित रहेका थिए । घाँटीको क्यान्सरले थला परेका उनको बेलायतको अल्डरसटस्थित निवासमा निधन भएको हो ।
सन् १९८२ मा ‘फर्की हेर मेरो जीवन’ गीतबाट आफ्नो गायिकी जीवनको सुरुवात गरेका उनका गाजलुले आँखा छोप्ने, मुसुमुसु हाँसिदेउ न लैलै, मायाले माया गाँसी देउ, फर्की हेरेँ, चिसो बतासले, मलाई धेरै धेरै माया चाहिन्छलगायतका गीत लोकप्रिय छन् ।
उनले सन् १९७१ मा बेलायती सेनामा भर्ती भएपछि सन् १९७३ मा साथीहरु विजय थापालगायतसँग मिलेर ‘हिमालय ब्यान्ड’ खोलेका हुन् । उनका २ छोरी, १ छोरा र श्रीमती छन् ।
