केन्यामा ‘यौनदासी’ भनिएका १२ नेपाली युवतीलाई स्वदेश फर्काइए, तर उनीहरु भन्छन् ‘हामी खुसी थियौँ’
मानव तस्करको गिरोहमार्फत अफ्रिकी राष्ट्र केन्याका डान्सबारमा पुगेका १२ नेपाली युवतीलाई स्वदेश फर्काइएको छ । अन्तर्राष्ट्रिय आप्रवासी संगठन-आईओएमको सहयोगमा उनीहरुलाई नेपाल फर्काइएको उनीहरुलाई उनीहरुलाई आफन्तको जिम्मा पनि लगाइएको छ ।
नेपाल प्रहरीको मानव बेचनविखन अनुसन्धान ब्युरोले उनीहरुको परिवारलाई जिम्मा लगाएको हो । नेपालबाट ल्याइएका युवतीलाई यौनदासी बनाइएको भन्दै केन्याका सञ्चार माध्यमले समाचार प्रकाशित गरेका थिए ।
स्थानीय प्रहरीले नेपाली युवतीलाई यौनदासी बनाउने ‘मालिक’ लाई पक्राउ गरी कारबाही गरिरहेको छ ।यद्यपी, प्रारम्भिक अनुसन्धानका क्रममा उद्धार गरिएका नेपाली युवतीहरु मध्ये विभिन्न मितिमा उनीहरु भारतको बाटो हुँदै अफ्रिका गएका थिए ।
स्थानीय प्रहरीले अवैध धन्दा गर्ने डान्सबार तथा रेष्टुरेन्टविरुद्धको कारबाहीका क्रममा उक्त तथ्य फेला परेको थियो । डान्सबार तथा रेस्टुरेन्टका सन्चालकलाई पक्राउ गरेपछि त्यहाँ कार्यरत नेपाली युवतीहरुलाई केन्यास्थित गैरआवासीय राजनीतिक मिसन, नेपाली दुतावासले ल्याएर राखिएका थिए ।
अन्तर्राष्ट्रिय आप्रवासी संगठनको सहयोगमा तिनै १२ जना नेपाली युवतीहरुलाई बिहीबार नेपाल फर्काइएको छ । त्रिभुवन विमानस्थलमा भने ती युवतीहरु आफूलाई नेपाल फर्काइएकोमा आक्रोशित देखिएका थिए ।
‘हामीलाई कसैसँग गुनासो छैन । हामी आफैँ केन्या पुगेका हौँ । त्यहाँ जान हाम्रो एक पैसा पनि खर्च भएको छैन । केन्यामा हामी खुसी थियौँ । तर खै, हामीलाई नेपाल किन फर्काइयो’, एक युवतीले भनिन् ।
प्रहरीले उनीहरुलाई केन्यासम्म र्पुयाउने गिरोहबारे बताउन बारम्बार अनुरोध गरे पनि उनीहरुले इन्कार गरेका छन् ।गिरोहबारे केही क्लु नआउने संकेत भएपछि प्रहरीले उनीहरुलाई आफन्तको जिम्मा लगाएको छ ।
नेपाल फर्काइएका युवतीहरु २२ देखि ३० वर्ष उमेरसम्मका रहेका छन् । फर्काइएकामध्ये ११ महिना अघि पुग्नेदेखि गएकै दिन पक्राउ पर्नेसम्म छन् ।
काम गर्ने बारमा पुगेकै दिन दुई नेपाली युवती पक्राउ परेको ब्युरोले जनाएको छ । सिन्धुपाल्चोक, धादिङ, दाङ, लमजुङलगायत जिल्ला घर भएका उनीहरु भारत हुँदै केन्या पुगेका थिए ।
