‘आरक्षण बचाउ आन्दोलन’को नाममा लोकसेवा केन्द्रीय कार्यालय अगाडि प्रदर्शन
काठमाडौं : ‘आरक्षण बचाउ आन्दोलन’को नाममा लोक सेवा केन्द्रीय कार्यालय अगाडि प्रदर्शन भएको छ ।
लोकसेवाले स्थानीय तहमा गरेको विज्ञापन समावेशी र समानुपातिक नभएको भन्दै विभिन्न संघ-संगठनहरूले खारेजी माग गर्दै लोक सेवा आयोगको केन्द्रिय कार्यालय अनामनगर अगाडि प्रदर्शन भएको हो ।
प्रदर्शका कारण लोकसेवा कार्यालय अगाडि केहीबेर तनाब भएको थियो । सडकमा प्रदर्शन गरेकाले सवारी आवागमनसमेत प्रभाव परेको थियो ।
प्रहरीका अनुसार तनाव सिर्जना भएपछि प्रहरीले हस्तक्षेप गरेर प्रदर्शनकारीलाई हटाइएको हो । लोकसेवा आयोगले गत असारमा संघीय मामिला तथा सामान्य प्रशासन मन्त्रालयको सिफारिसमा स्थानीय तहका विभिन्न पदमा ९१३१ कर्मचारीको विज्ञापन गरेको थियो ।
लोक सेवाको खुला विज्ञापनसँग आदिवासी जनजाति महासंघलगायतका विभिन्न संघ-संगठनहरू रुष्ट भएका छन् । अहिलेको विज्ञापन खारेज गर्दै समावेशी, समानुपातिक सिद्धान्तका आधारमा पुनः विज्ञापन गर्नुपर्ने माग राख्दै उनीहरू चरणवद्ध आन्दोलन गर्दै आएका छन् ।
सर्वोच्चले विज्ञापन खारेज गर्न नपर्ने फैसला गरेपछि लोक सेवा आयोग परीक्षा सञ्चालनको तयारीमा छ । शुक्रबारबाट परीक्षा सुरु हुँदैछ ।
