छलफलका लागि महानगरको गेटमा लगाएको ताला खोल्न महानगरका प्रमुखको आग्रह
पोखरा : पोखरा महानगरका प्रमुख मानबहादुर जिसीले कांग्रेसबाट निर्वा्चित जनप्रतिनिधिहरुलाई छलफलका लागि महानगरको गेटमा लगाएको ताला खोल्न आग्रह गरेका छन् ।
शुक्रबार महानगरमै पत्रकार सम्मेलन गरेर प्रमुख जिसीले छलफलमा आउन महानगरको मुल गेटमा लगाएको ताला खोल्न आग्रह गरेका हुन् ।
केही दिनअघि महानगरले प्रस्तुत गरेको बजेटमा कांग्रेसबाट निर्वा्चित प्रतिनिधि भएको वडामा भेदभाव गरेको भन्दै महानगरको मूलगेटमा ताला लगाएका थिए। उनीहरुले बिहीबार रातो किताब च्यातेर पनि विरोध जनाएका थिए ।
महत्वपूर्ण योजनाहरु छुटेको भए थपघट गर्न सकिने भन्दा पनि कांग्रेसबाट निर्वा्चित जनप्रतिनिधीहरुले अनावश्यक विरोध जनाईरहेको मेयर प्रमुखले बताए । ‘मुलगेटको ताला खोल्नुस् छलफल गरेर टुंग्याउँ भनेको छु उहाँहरु मान्नु भएको छैन,’ मेयर जीसीले भने, ‘महत्वपूर्ण योजनाहरु भए थपघट गरौँ । परिवर्तन गरौँ, प्रभावकारी विकासमा लागौँ भन्दा मेयरको पाराले दुख पाए साराले भनेर गेटमा नारा लगाएर हुन्छ ?’
पोखरा महानगरले ७ अर्ब ५४ लाखको बजेट ल्याएको छ । बजेट माथी छलफल नै नगरी एकलौटी ढंगबाट मेयरले पारित गरेको कांग्रेसबाट निर्वा्चितहरुको आरोप छ । मेयरले प्राथमिकताको आधारमा वडाहरुमा बजेट विनियोजन भएको समेत बताए ।
