असार २२ मा कांग्रेसको केन्द्रीय समिति बैठक बस्दै
काठमाडौं : राष्ट्रिय जागरण अभियानको छलफलका लागि नेपाली कांग्रेसले यही असार २२ गते केन्द्रीय समितिको बैठक बोलाएको छ । पार्टीले सञ्चालन गरेको उक्त अभियानको समीक्षालगायत विषयमा छलफल गर्न कांग्रेसले बैठक बोलाएको हो ।
असार २२ गते बिहान ११ बजेका लागि बैठक बोलाइएको कांग्रेस मुख्य सचिव कृष्णप्रसाद पौडेलले जानकारी दिएका छन् । बैठकमा नियमावली संशोधन मस्यौदा समितिद्वारा प्रस्तुत नेपाली कांग्रेसको नियमावली, २०७६ माथि छलफल, भातृ एवं शुभेच्छुक संस्थाको विधान र समसामयिक राजनीतिक विषयमा छलफल गरिनेछ ।
