कर छली गरेपछि टुटललाई सरकारको पत्र : छलिएको ३ करोड ३९ लाख कर तिर्नू
काठमाडौं : ‘राइड सेयरिङ’ कम्पनी टुटलले ग्राहकबाट उठाएको र आफूले पनि तिर्नुपर्ने कर छलेको पुष्टि भएको छ । आन्तरिक राजश्व कार्यालय ललितपुरले कर छली गरेको ठहर गर्दै कम्पनीलाई दाखिलाका लागि लेखेको छ ।
केही समयअघि सरकारले निजी सवारीले शुल्क लिएर यात्रु बोक्न नपाउने भन्दै टुटल सेवा बन्द गर्न लागेको थियो । तर सामाजिक सञ्जालमा तीव्र आलोचना भएपछि प्रधानमन्त्री केपी शर्मा ओलीकै निर्देशनमा महानगरीय ट्राफिक प्रहरी माहाशाखा पछि हटेको थियो ।
टुटलले ३ करोड ३९ लाख बराबरको कर छलिएको भेटिएको कार्यालयले जनाएको छ । यसमा ३ वर्षको अवधिको मूल्य अभिवृद्धि कर (भ्याट), आयकर, जरिवाना र ब्याज समेत जोडिएको छ ।
आन्तरिक राजश्व कार्यालय ललितपुरका प्रमुख लालबाहदुर खत्री टुटलले कर छली गरेको देखिएकाले कर निर्धारण गरेर दाखिलाका लागि पत्र लेखिएको बताए । कार्यालयले लामो समय लगाएर टुटलको कारोबारको अनुसन्धान गरेको थियो । टुटलले सुरुमा जानकारी नभएर भ्याट उठाएको र कर कसरी कहाँ कुझाउने भन्ने जानकारी नहुँदा यस्तो अवस्था आएको जवाफ कार्यालयलाई दिएको थियो ।
कम्पनीले सेवा सुरुआतको वर्षमा ग्राहकसँग भ्याटसहितको रकम जोडेर शुल्क उठाएको थियो । तर, उठाएको करबापतको रकम सरकारलाई बुझाएन । पछिल्लो वर्ष भने उसले भ्याट शीर्षकमा कर उठाउन छाड्यो । ‘उठाएको कर सरकारलाई नबुझाएपछि हामीले कारोबार हेरेर कर निर्धारण गरेका हौं,’ प्रमुख खत्रीले भने । टुटलले आफ्नो आय कर पनि नतिरेको भेटिएको छ ।
आय कर पनि नतिरी व्यवसाय चलाएकाले त्यसअनुसार कर निर्धारण गरेर त्यसमा ब्याज र हर्जना पनि लगाइएको छ ।अब टुटलले आफूलाई लगाइएको कर चित्त नबुझे आन्तरिक राजश्व विभागमा पुनरावलोकनका लागि निवेदन दिन सक्छ । यदि पुनरावलोकन नजाने भए निर्धारित कर टुटलले तिर्नैपर्नेछ ।
तर, पुनरावलोकनपछि निर्धारित कर भने आन्तरिक राजश्व कार्यालयले जोड गरेर असुल गर्नेछ । टुटल पछिल्लो सयममा काठमाडौंमा निकै प्रचलित मोबाइल एप हो । जसमा जोकोही मोटरसाइकलवाला आवद्ध भएर यात्रुलाई ट्याक्सीकै जसरी सेवा दिन सक्छन् ।
