पशुपतिमा यसवर्ष घट्यो भक्तजनको भीड, तर देशभरका बिभिन्न शिवालयमा बढ्यो घुइचो (देशभरका ४० तस्विर)

- नागरिक टाइम्स/संवाददाता

२० फाल्गुन २०७५, सोमबार ००:००

काठमाडौँ : महाशिवरात्रिका अवसरमा सोमवार गतवर्षहरुको तुलनामा यसवर्ष पशुपतिनाथ मन्दिरमा भक्तजनको भीड घटेको छ । तर देशभरका बिभिन्न शिवालयमा पूजाआजा एवं दर्शन गर्ने भक्तजनको घुइचो भने बढेको छ । महाशिवरात्रिका अवसरमा बिहान ३ बजेदेखि नै पशुपतिका चारै ढोका खोलिएको थियो ।

पशुपति क्षेत्र विकास कोषका अनुसार बिहानैदेखि लाखौँ भक्तजन पशुपतिनाथ मन्दिरमा दर्शनका लागि लाममा बसेका थिए । तर अन्य वर्षको तुलनामा यर्सवर्ष भक्तजनको भीड घटेको छ । पशुपति मूल मन्दिर प्रवेशका लागि बाहिरबाट तीन मूल मन्दिर परिसरमा प्रवेश गरेपछि पाँच लाइनको व्यवस्था गरिएको थियो ।

मित्रपार्क तथा गौरीघाटबाट उमाकुण्ड-दक्षिणामूर्ति–रुद्रगाडेश्वर हुँदै उत्तरढोकाबाट एक-एक गरी दुई, जयबागेश्वरी-इट्टापाखा–भुवनेश्वरी अघिको सानो फलामे ढोका हुँदै पश्चिम प्रवेशद्वारबाट एक, बत्तिसपुतली, गौशाला तथा विमानस्थल गौशाला भएर पिंगलास्थान-सुमार्गी भवन-चारशिवालय-पञ्चदेवल हुँदै दक्षिणढोकाबाट एक/एक गरी दुई लाइनको व्यवस्था गरिएको कोषका सदस्य सचिव डा प्रदीप ढकालले बताए ।

उनका अनुसार तिलगङ्गा, कोषको कार्यालय, महानगरीय प्रहरी वृत्त गौशाला, सिफलचौर, गुह्येश्वरी पारीको खाली भाग गरी पाँच स्थानमा सवारी पार्किङको व्यवस्था मिलाइएको थियो ।  पशुपतिनाथसँगै सोमवार बिहानैदेखि राजधानीको उत्तरपूर्वी भेगमा रहेको गोकर्णेश्वर, वसन्तपुरस्थित शिव मन्दिरलगायत उपत्यका बाहिरका खोटाङको हलेसी धाम, अछामको वैजनाथ धाम, सिन्धुलीको कुशेश्वरलगायत देशभरका शिव मन्दिरमा भक्तजनको भीड लागेको थियो ।

यसवर्ष देशको अन्य भागमा भक्तजनको भीड बढेको छ । महाशिवरात्रिको अवसरमा सोमवार दिउँसो राष्ट्रपति विद्यादेवी भण्डारी र उपराष्ट्रपति नन्दबहादुर पुनले समेत दर्शन एवं पूजाआजा गरेका छन् ।

हेर्नुस् फोटोफिचर :