प्रदेश २ को ‘बेटी पढाऊ, बेटी बचाऊ’ अभियानमा संघीय सरकारद्वारा ५० करोड अनुदान
जनकपुर : प्रदेश नम्बर २ का मुख्यमन्त्री लालबाबु राउतले ‘बेटी पढाऊ, बेटी बचाऊ’ अभियान प्रदेशका ८ वटै जिल्लामा लागु हुने बताएका छन् । संघीय सरकारले प्रदेश नम्बर २ सरकारलाई ५० करोड रुपैयाँ विशेष अनुदान दिएको छ ।
प्रदेश २ का मुख्यमन्त्री लालबाबु राउतले आइतबार पत्रकार सम्मेलन गरी यो कार्यक्रम २ नम्बर प्रदेशका सवै जिल्लामा गत माघ १ बाटै लागु भएको घोषणा गरे । प्रदेश सरकारले २०७५ साल माघ १ पछि जन्मेका छोरीहरुका लागि जन्मेको २० वर्षपछि १ लाख २५ हजार रुपैयाँ सम्बन्धित बैंकबाट पाउने गरी व्यवस्था मिलाएको जानकारी दिए ।
जसका लागि सरकारले प्रभु बैंकको खातामा १३ हजार ६ सय ४६ रुपैयाँ जम्मा गरिदिने र बैंक आफैंले पनि १ हजार थपिदिएपछि त्यो रकम २० वर्षमा एक लाख २५ हजार रुपैयाँ हुनेछ । उक्त रकम २० बर्षपछि मात्रै झिक्ने सकिनेछ । योजना अन्तर्गत छोरी जन्मिएपछि बिमा बापतको रकम प्राप्त गर्न केही शर्तहरू राखिएको छ । त्यो शर्त पुरा गर्नुपर्नेछ ।
जसअन्र्तगत छोरीका अभिभावकले बिमा गराउँदा प्रतिबद्धता-पत्रमा हस्ताक्षर गर्नुपर्ने हुन्छ । कम्तिमा विद्यालय शिक्षा अन्तर्गत कक्षा १२ वा सो सरहको शिक्षा पूरा गराएको हुनुपर्न व्यवस्था छ । प्रचलित कानूनको अधिनमा रहेर छोरीको उमेर २० वर्ष पूरा नभएसम्म विवाह गराउन पाइने छैन भने छोरा र छोरीबीच लैंगिक विभेदरहित समान व्यवहार गर्नुपर्ने हुन्छ ।
बिमा अवधि समाप्त भएपछि प्राप्त हुने मुद्दती बचत रकम छोरीको क्षमता विकासमा खर्च गर्नुपर्ने व्यवस्था गरिएको छ । बुँदागत सर्त सहितका प्रतिबद्धतापत्रमा अभिभावकले बिमा गराउने बेलामा हस्ताक्षर गर्नुपर्ने हुन्छ । अर्थात् बिमा गराएको भएपनि कक्षा १२ पास नभएको बेटीले २० वर्षभन्दा कम उमेरमा बिहे गरेको खण्डमा ती छोरीले उक्त रकम प्राप्त गर्ने छैनन् ।
बिमा भएको अवस्थामा पनि बिमित रकम पाउन नसक्ने छोरीको रकम भने प्रदेश सरकारको सञ्चित कोषमा जम्मा हुने मुख्यमन्त्री राउतले जनाए । उनले कुनै गम्भीर रोग लागेमा छोरीले १२ कक्षासम्मको पढाई पूरा गर्न नसके मुख्यमन्त्रीको नेतृत्वमा गठित निर्देशन समितिको वैठकबाट उक्त रकम छोरीलाई प्रदान गर्न सकिने प्रावधान राखिएको छ ।यो व्यवस्थाले प्रदेशमा डरलाग्दो अवस्थामा रहेको भु्रण हत्या न्यूनीकरण हुने अपेक्षा गरिएको मुख्यमन्त्री राउतले बताए ।
यसरी हुन्छ बीमा :
छोरी जन्मेको मितिले १ सय ८० दिनभित्र अभिभावकले बीमाका लागि निवेदन दिनुपर्ने हुन्छ । त्यसका लागि छोरीको जन्मदर्ता प्रमाण पत्र अनिवार्य छ । त्यस्तै जन्मदर्ता प्रमाणित प्रतिलिपि, अभिभावकमध्ये एक वा दुवैको नागरिकता प्रमाणपत्रको प्रमाणित प्रतिलिपि, छोरी र अभिभावकको पासपोर्ट साइजको ६ थान फोटो सहित विभिन्न कागजात सहितको निवेदन दिनुपर्नेछ ।
प्रदेश सरकारले पहिलो पटक लागु गर्दा ५ करोड ६० लाख रुपैयाबाट प्रदेशको विभिन्न जिल्लाका ८ वटा स्थानीय तहमा लागु गरेको थियो । संघिय सरकारले ५० करोड रुपैया विशेष अनुदान दिएपछि ८ वटै जिल्लाको हरेक स्थानीय तहमा लागु गर्ने भएका छन् ।
‘बेटी पढाऊ, बेटी बचाऊ’ अभियानका लागि सहजकर्ता नियूक्त :
प्रदेश नम्बर २ सरकारले मुख्यमन्त्री ‘बेटी पढाऊ, बेटी बचाऊ’ अभियानलाई प्रभावकारी बनाउनका लागि ८ वटै जिल्लामा सहजकर्ता नियूक्त गरेका छन् । मुख्यमन्त्री लालबाबु राउतले पत्रकार सम्मेलनबाटै प्रत्येक जिल्लामा ‘बेटी पढाऊ, बेटी बचाऊ’ अभियानलाई प्रभावकारी तथा सहयोगका निम्ति सहजकर्ता नियूक्त गरेको घोषणा गरे ।
