यस्तो छ प्रदेश र स्थानीय सेवा ऐनका लागि तयार पारिएको संघीय मापदण्ड
काठमाडौ : सङ्घीय मामिला तथा सामान्य प्रशासन मन्त्रालयले ‘प्रदेश निजामती सेवा ऐन’ र ‘स्थानीय सेवा ऐन’ बनाउन मापदण्ड तयार पारेको छ ।
प्रदेश र स्थानीय तहले आ-आफ्नो ऐन बनाउनुपर्ने भएकाले सो ऐनका लागि आवश्यक मापदण्ड मन्त्रालयले तयार पारेको मन्त्रालयका सचिव दिनेशकुमार थपलियाले जानकारी दिनुभयो ।
मन्त्रालयले प्रधानमन्त्री तथा मन्त्रिपरिषद्को कार्यालय र कानून, न्याय तथा संसदीय मामिला मन्त्रालयबाट स्वीकृत लिएर उक्त मापदण्ड तयार पारेको हो । मापदण्डका आधारमा प्रदेश र स्थानीय तहले आ-आफ्नो ऐन बनाउने सचिव थपलियाले बताउनुभयो ।
उहाँका अनुसार मापदण्डमा प्रदेश र स्थानीय तहले कर्मचारी भर्ना प्रदेश लोकसेवाबाट गर्नुपर्ने, सबै स्थानीय तहलाई एकीकृत प्रणालीमा राखिएको, प्रदेशभित्र रहेका स्थानीय तहका कर्मचारीको सरुवा एक स्थानीय तहबाट अर्कोमा हुने, कुनकुन तहमा खुला र बढुवा राख्ने जस्ता कुरा समेटिएका छन् ।
प्रदेश ऐनमा प्रदेश किताबखानासमेत रहने व्यवस्था गरिएको छ । प्रदेश मातहतका कार्यालयको सरुवा बढुवा प्रदेश मन्त्रिपरिषद्ले गर्ने उल्लेखसमेत गरिएको उहाँले बताउनुभयो । यसैगरी मन्त्रालयले सङ्घीय निजामती सेवा विधेयक स्वीकृतका लागि मन्त्रिपरिषद्मा पठाएको छ ।
